DILI, 11 dezembru 2024 (TATOLI) – Sekretáriu jerál g7+, Helder da Costa, halo vizita kortezia ba Prezidente Repúblika, José Ramos Horta, hodi atualiza alkansu atividade serbisu g7+ nian ne’ebé hala’o durante tinan ida nia laran iha nível globál no mós nível nasionál.
“Liuliu, ami temi katak foin daudaun iha última atividade iha COP29 kona ba mudansa klimátika iha Baku azerbaijan,” Sekretáriu jerál Helder da Costa informa, hafoin hasoru malu ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru-Pité, Dili, kuarta ne’e.
Nune’e mós tuir Helder da Costa, kona-ba grupu g7+ headline news ne’ebé dada atensaun mundu nian liu-liu país doadór sira para hatudu sira-nia kompromisu hodi ajuda país sira ne’ebé atravesa postu-konflitu ho frajilidade iha mundu tomak.
“Nasaun 20 nia xamada atensaun, tanba headline news iha mundu tomak. Ami mós informa ba Prezidente Repúblika kona-ba mal sira ne’ebé alkansa durante tinan hirak nia laran” nia realsa.
Sekretáriu jerál g7+, Helder da Costa esplika, g7+ oras ne’e rekoñesidu mundialmente inklui mós Sekretáriu Jerál Organizasaun Nasaun Unida (ONU), António Guterres, Prezidente Repúblika Populár Xina, Xi Jinpin no mós organizasaun internasionál, mensiona g7+.
“Portantu, ba ita Timoroan nu’udar país ida ki’ikoan, maibé ita mós sai na’in, uma-na’in Organizasaun g7+, ne’ebé nian naran komesa boot tebes-tebes iha Mundu,” nia konsidera.
Tanba ne’e, Sekretáriu jerál g7+, Helder da Costa esplika, Prezidente Repúblika apresia tebes ho alkansu signifikativu ne’ebé iha, Prezidente mós hato’o katak tinan oin sei partisipa iha reinaun sira ne’ebé g7+ halo ho entidade Internasionál sira selseluk.
“Ami mós ohin informa ba Prezidente kona-ba realizasaun reuniaun Ministeriál g7+ nian ne’ebé sei hala’o iha Seoul Koreia fo Súl, iha g7+ sei selebra 15 anos ezisténsia g7+ nian, dezde 2010 até 2025, portantu reuniaun sei hala’o iha fulan-abríl iha Seoul Repúblika Koreia. Hakarak hatete ba ita-boot sira katak Prezidente Repúblika ohin espresa nian apresu ho gratidaun,” nia dehan.
Alende ne’e, g7+ relata mós kona-ba situasaun iha Moçambique no Guiné-Bissau no selseluktan.
“Portantu ita espresa ita-nia preokupasaun ba rai sira ne’e. Maibé, Prezidente mós nu’udar Xefe Estadu dejeza katak buat hotu sei normaliza iha tinan oin mai. Nune’e ami g7+ kontinua nafatin serbisu hamutuk ho Governu Timor-Leste, no governu sira husi nasaun 20, atu nune’e ita bele kontinua nafatin promove pás no estabilidade, dezenvolvimentu iha País membru sira ne’e,” nia katak.
Sekretáriu Jerál G+7, Helder da Costa, hateten, Timor-Leste, liuhusi Organizasaun g7+ hodi promove naran di’ak g7+ nian no Timor-Leste nian iha mundu no ema admira haree de’it país sira iha CPLP laran, haree Guiné Bissau no Mosambique agora liuhusi dezafiu oin-oin.
Maibé, Timor-Leste país ida estavel no paíz ida haree agora dezenvolvimentu komesa la’o ona. Purtantu husi atividade ne’ebé hala’o durante ne’e hatudu vizibilidade, hatudu impaktu dezenvolvimentu iha Timor-Leste.
“Ha’u bele hatete hanesan ne’e, Prezidente Repúblika mós ohin konkorda katak ita mantein nafatin pás, estabilidade ita-nia rai laran hodi nune’e ita hala’o servisu ho organizasaun internasionál sira seluk”, nia haktuir
Jornalista :Osória Marques
Editór: Rafael Ximenes de A. Belo
