DILI, 11 dezembru 2024 (TATOLI)–Sekretáriu Estadu Peska (SEP), Domingos dos Santos, husu ba foinsa’e sira atu investe iha setór agrikultura iha rai-laran atu bele hetan rendimentu di’ak ba sira-nia aan no ba família.
“Servisu agrikultura ne’e di’ak-liu kompara sai funsionáriu públiku. Baibain ema hateten servisu agrikultór ne’e servisu ne’ebé hanesan atan, maibé han hanesan liurai. Funsionáriu servisu hanesan liurai hodi hatais kazaku no gravata maibé debe barak iha fulan klaran,” governante ne’e hateten iha sorumutu atu hodi hanoin hamutuk ba kondisaun real relasiona ho asuntu “Agrikultura, saúde, bee-moos edukasaun hodi buka dalan ba hatan dezafiu sira”, iha salaun UCT Balide.
Tanba ne’e, nia enkoraja joven sira investe iha setór agrikultura hodi bele hetan moris di’ak.
”Ha’u hein katak ita labele kompete de’it iha setór públiku, maibé setór agrikultura mós joven potensiál sira bele halo servisu,” nia dehan.
Tuir nia, joven sira halai hotu mai sidade tanba laiha kampu traballu no husik katuas no ferik sira mesak mak halo toos no natar no sira-ne’e enerjia menus ona hodi halo produsaun agrikultura labele sa’e.
Ezekutivu ne’e hateten, Governu halo de’it polítika no tau osan maibé servisu ne’e atu halo investimentu iha setór agrikultura iha autór sira iha área rurál.
“Ita mós tinan-tinan haruka joven sira ba Israel ba eskola agrikultura iha ne’ebá atu sira fila mai bele dezenvolve área ne’e. Preparasaun bazeia ba ita-nia kapasidade no orsamentu ita-nia parseria ho nasaun sira hodi haruka ita-nia joven sira ba tuir formasaun,” nia dehan.
Jornalista : Jesuína Xavier
Editór : Cancio Ximenes
