Ahi-han motuk uma tolu iha Beloi
VIUQEUQE, 12 dezembru 2024 (TATOLI)-Ahi-han motuk uma komunidade tolu iha área Beloi, suku Caraubalu, postu administrativu Viqueque Vila, munisípiu Viqueque, iha kinta, maizumenus tuku 19:00, kalan.
“Akontese ahi-han uma tolu iha Beloi. Ita-nia ekipa bombeiru to’o kedas fatin akontesementu hodi halo intervensaun ba uma tolu ne’ebé mak ahi han. Nune’e mós ekipa bombeiru halo ona evakuasaun ba vítima sira hodi lori bá sentru evakuasaun iha Sira-Lari, ne’ebé ita-nia vitima sira-ne’e agora iha hotu ona fatin evakuasaun”, dehan Komadante Autoridade Protesaun Sivil (APC, sigla portugés) munisípiu Viqueque, Cirilio Soares Gomes, hateten ba Tatoli, liuhusi telefónika, kalan ne’e.
Akontesementu ne’e, nia dehan ekipa seidauk identifika loloos kauza husi insendiu referida, nune’e ekipa daudan sei destaka iha fatin akontesimentu hodi halo indetifikasaun.
“To’o agora ita seidauk identifika kauza husi insediu, ekipa sei halo verifikasaun detallu. Depois maka relata ba públiku kona-ba insediu ne’ebé afeta ba uma tolu”, nia afirma.
Alende ne’e, nia dehan, sasán sira-ne’ebé ahi-han ekipa seidauk rekolla dadús hotu tanba ekipa foku ba vítima sira.
“Akontesimentu ne’e afeta ba uma ka’in-tolu, dadús kada família uma-ka’in ami seidauk rekolla tanba sei preokupa ba atuasaun no transporta vítima sira ba fatin seguru. Uma tolu ne’ebé ahi han maoria uma kalen hotu maka ahi han”. Tenik nia.
Alende ne’e, ekipa APC distribui ona hahan nesesidade báziku ba vítima uma-ka’in tolu ne’ebé afetadu ba insendiu hodi auguenta ba moris.
Tuir dadús vítima afetadu uma-ka’in kompostu husi Abilio Baptista da Costa idade 51, aldeia Mane Haat suku Caraubalu membro família na’in-8 feto na’in-2 no mane na’in-6 no Lemos Pires ho idade 52, husi aldeia Maca Usa, suku Irabin de Cima, postu Uatucarbau ho totál membru família hamutuk na’in-10, feto lima no mane lima.
Enkuantu, uma-kain ida seluk Agustina Amaral ho idade 63, husi aldeia Lamaclaran, suku Caraubalu totál membru na’in-8, feto na’in-4 no mane na’in-4.
Jornalista : Vitorino Lopes da Costa
Editór : Floréncio Miranda Ximenes
