Deputadu sira presiza hatudu atitude di’ak hodi dignifika órgaun soberania daruak
DILI, 12 dezembru 2024 (TATOLI)—Prezidente Parlamentu Nasionál (PPN), Maria Fernanda Lay, husu Deputadu sira atu hatudu atitude di’ak hodi bele dignifika órgaun soberania daruak ne’e.
“Atu dignifika, fila ba atitude Deputadu sira-nian. Prezidente Parlamentu la’ós inan atu eduka Deputadu sira, ita hotu-hotu iha ne’e iha oan hotu ona. Dalabarak ha’u hateten, edukasaun sai husi família. Se família haki’ak nia to’o boot labele eduka para labele iha atitude hanesan ne’e,” PPN hateten hodi responde Agência TATOLI hafoin ramata reuniaun líder bankada iha sala konferénsia PN, kinta ne’e.
Foin lala’is, mosu dezentendimentu ida iha arredór PN, entre Deputadu na’in-rua ne’ebé ida husi bankada Governu no ida opozisaun, ikus mai sai ‘virál’ mós iha rede sosiál, nune’e iha líder bankada foti mós kestaun ne’e.
“Ha’u mai labele eduka Deputadu. Maibé, ohin, foti iha líder bankada katak mezmu ami seidauk iha desizaun tanba kórum laiha, katak Deputadu ne’ebé iha repetisaun aktu sai husi norma, rejimentu fó dalan. Maibé, vale iha plenária, ha’u labele taka nia ibun labele ko’alia buat ruma nia labele ko’alia. Insulta privadu ha’u mós iha, ha’u mós hakfodak come é que, um Deputadu la respeitu Prezidente foi eleitu lejitimamente, ha’u labele obriga nia,” nia dehan.
Nune’e, nia dehan, agora fila ba públika ka povu ne’ebé hili Deputadu ne’e mai tuur iha ne’e loos ka lae, agora se la loos depois julgamentu tinan lima.
“Agora ami trata malu, ha’u ignora tanba se ha’u hatán ita istóri malu, ha’u lakohi, ha’u hateten dalabarak, bainhira istória malu, ha’u labele tuur iha ne’e rona imi trata ema. Ha’u hamriik, ha’u sai, ha’u fila mai kuandu normál’. Mais horibainhira tuku malu ne’e iha li’ur, polísia iha. Ne’ebé, ohin, ha’u hateten husik raan tiha ba mak ba keixa polísia de’it di’ak-liu, menus problema. Ba ha’u, tanba Prezidente Parlamentu la’ós juis ba julga Deputadu sira, ida-idak kontrola nia aan. Prezidente Repúblika mós ko’alia ona katak, atitude um Deputadu fó impaktu ladi’ak ba partidu ne’ebé eleze nia mai iha PN, agora fila ba líder bankada, líder partidu para bolu atensaun,” nia dehan.
Jornalista : Nelson de Sousa
Editór : Cancio Ximenes
