Janeiru-Novembru, HNGV hatama reseita ba kofre Estadu hamutuk rihun $417
DILI, 12 dezembru 2024 (TATOLI)— Durante fulan janeiru to’o novembru 2024, HNGV hatama ona reseita ba kofre Estadu liu husi pasiente lokál no estranjeiru hamutuk ho valór $417,277.69, Diretora Administrasaun Finanseira no Servisu Lojístika iha Ospitál Nasionál Guido Valadares (HNGV), Sara Maria Xavier relata.
“Iha ne’e ha’u hakarak informa katak iha totál, rendimentu ka despeza médiku iha HNGV husi janeiru to’o novembru 2024, ita iha $417,277.69 entaun reseita sira ne’e ita tau ba kofre Estadu,” Diretora Sara Maria Xavier, dehan ba jornalista sira iha HNGV, ohin.
“Kada fulan rendimentu ne’ebé tama mak husi konsulta médiku ezame sira husi klínika sira, vasina mean ka vasina isin-manas atu fasilita ema estranjeiru sira ne’ebé atu halo viajen ba rai-li’ur, ne’ebé obriga atu iha kartaun vasina mean, entaun reseita sira mai husi ida ne’e,” ezekutiva ne’e hatutan.
Nia dehan, husi reseita sira ne’e mai husi aluga fatin ba sentru matan nian, iha ne’ebé ONG fasilita ókulu, nune’e aluga fatin iha HNGV tenke selu ba kada fulan.
Fundu sira ne’e mai mós husi departamentu oftalmolojia no unidade sira iha HNGV, ne’ebé simu pasiente estranjeiru sira, inklui unidade sira iha VIP, ne’ebé pasiente sira toba kalan, nune’e mós prosedimentu sira seluk hanesan operasaun, partu, ba pasiente estranjeiru sira ne’ebé halo hela tratamentu iha HNGV.
Diretora Sara Maria Xavier afirma, pasiente sira ne’ebé simu tratamentu selu ida ne’e mai husi pasiente estranjeiru sira, tanba pasiente lokál sira livre ezetu ba sala VIP (Very important person).
Pasiente estranjeiru husi klínika 33, ne’ebé mai halo teste laboratóriu iha HNGV ne’e mos selu, fulan ida-ne’e de’it husi klínika 33, rendimentu ho valór $510 mak hatama ba HNGV.
“Entaun ha’u hakarak informa husi relatóriu rezumu badak kona-ba pasiente sira ne’ebé mai konsulta iha HNGV ne’ebé selu taxa ne’e, pasiente lokál iha ne’ebá mós pasiente estranjeiru, nune’e husi totál pasiente estranjeiru ne’ebé mai konsulta iha HNGV husi primeiru no segundu semester kuaze ema 500 mak mai halo tratamentu iha HNGV,” nia fó sai.
Taxa ne’ebé pasiente sira selu mak hanesan ba tratamentu, ezame, sira mós selu prosedimentu, teste laboratóriu, apoiu diagnóstiku, nune’e mós sira ne’ebé iha sala internamentu VIP no seluk tan.
“Pasiente estranjeiru sira ne’ebé halo tratamentu iha VIP sala internamentu loron ida $50 ho ai-moruk no pasiente lokál $35 la inklui ai-moruk tanba ne’e gratuita,” nia esplika.
Diretora ne’e relata mós katak totál rendimentu husi tinan-2023 hamutuk $380,988.87 kompara ho tinan ida ne’e, tinan ida-ne’e nia rendimentu aas liu.
Jornalista: Felicidade Ximenes
Editór: Rafael Ximenes de A. Belo
