DILI, 12 dezembru 2024 (TATOLI) – Primeiru-Ministru, Kay Rala Xanana Gusmão, kinta ne’e, iha Palásiu Prezidensiál Dili, hodi hasoru malu ho Prezidente Repúblika, José Ramos-Horta, hodi atualiza regra ezekusaun Orsamentu Jerál Estadu (OJE) tinan 2025 ne’ebé mak aprova ona iha Konsellu Ministru.
“Enkontru semanál ho Prezidente Repúblika hodi informa, horiseik, ami iha Konsellu Ministru aprova ona regra ezekusaun OJE 2025, tanba ita tenke iha regra didi’ak atu ezekuta orsamentu sira ho di’ak,” Primeiru-Ministru hateten.
Nia dehan, bainhira laiha regra ezekusaun Governu sei hasoru problema boot iha jestaun finanseiru.
“Iha regra sira ne’e hotu atu haree mós ba aprovizionamentu hotu, tanba ita haree katak iha empreza balun ka’er projetu lima neen, maibé servisu hotu atrazadu, entaun iha regra ne’e programa aprovizionamentu sira hotu tenke liu husi ha’u, nune’e ha’u bele haree lai durante empreza ne’e ka’er halo buat ruma ka la’e, se la halo di’ak liu para haree empreza seluk,” dehan PM Xanana.
Dekretu-Lei, ne’ebé aprezenta husi Ministra Finansas, Santina José Rodrigues F. Viegas Cardoso, kona-ba Ezekusaun Orsamentu Jerál Estadu ba tinan 2025.
Diploma ida-ne’e estabelese regra kona-ba ezekusaun Orsamentu Jerál Estadu ba tinan 2025, ne’ebé aprova husi Lei nu. 8/2024, loron 26 fulan-novembru. Norma ne’ebé hatuur iha Dekretu-Lei ne’e bele aplika ba servisu no entidade hotu-hotu iha Subsetór Administrativa Sentrál, Subsetór Seguransa Sosiál no Subsetór Rejiaun Administrativa Espesiál Oekusi no Ambeno nian.
Jornalista: Hortencio Sanchez
Editor: Florencio Miranda Ximenes
