PN sei ratifika akordu haat iha semana oin

DILI, 12 dezembru 2024 (TATOLI)—Reuniaun líder bankada Parlamentár, kinta ne’e, deside ona ajenda iha reuniaun plenária iha tersa-semana oin sei halo ratifikasaun akordu haat.

Sekretáriu Estadu Komunikasaun Sosiál (SEKOMS), Expedito Dias Ximenes, hateten nia-parte reprezenta Governu partisipa iha reuniaun líder bankada atu bele akompaña ajenda ne’ebé líder bankada sira diskute no deside.

Normalmente loron kinta iha reuniaun líder bankada hodi deside ajenda ba reuniaun plenária iha segunda no tersa semana oin.

“Laiha ajenda orden do dia iha segunda, nune’e sei laiha plenária no sei iha plenária iha tersa-feira. Ajenda mak sei diskute kona-ba ratifikasaun ba akordu haat,’’ Sekretáriu Estady Komunikasaun Sosiál (SEKOMS), Expedito Dias Ximenes, hateten ba jornalista sira hafoin partisipa reuniaun líder bankada iha sala konferénsia PN, kinta ne’e.

Akordu ka rezolusaun ha’at ne’ebé Governu hato’o mai iha PN liuhusi komisaun B trata asuntu Negósiu Estranjeiru no Defeza ho Seguransa, mak hanesan dahuluk, akordu kona-ba serbisu entre Governu Timor-Leste (TL) ho Governu Malázia iha área aeria oinsá mak atu iha aviaun semo entre husi Malázia, Kualalumpur mai Dili, ne’ebé molok atu hala’o PN sei ratifika akordu ida-ne’e.

Nune’e mós sei ratifika akordu entre Governu TL ho Governu Filipina kona-ba izensaun vistu ba pasaporte diplomátiku ho pasaporte serbisu.

Sei ratifika mós akordu entre Governu TL ho Governu Vietname kona-ba izensaun vistu pasaporte diplomátiku ho pasaporte serbisu.

Ikus liu mak ratifika akordu entre Governu TL ho Governu Índia kona-ba izensaun vistu ba pasaporte diplomátiku no pasaporte serbisu.

Nune’e, Ministru Negósiu Estranjeiru no Kooperasaun (MNEK) no Ministru Transporte no Komunikasaun (MTK) sei mai partisipa mós hodi akompaña iha reuniaun plenária iha semana oin.

Jornalista : Nelson de Sousa

Editór        : Cancio Ximenes