DILI, 11 dezembru 2024 (TATOLI)— Sekretáriu Estadu Formasaun Profisionál no Empregu (SEFOPE), halo semináriu nasionál ba implementasaun polítika estratejia nasionál empregu 2017-2030.
“Husi semináriu ida-ne’e, ha’u hanoin di’ak tebes tanba semináriu ne’e ita hala’o no ko’alia kona-ba programa re-integrasaun sira, entaun oinsá atu hamosu empregu foun ba ita-nia joven sira mak ami halao servisu bazeia ba dekretu lei númeru 80/2023, 11 outubru koalia kona-ba lei orgánika Sekretaria Estadu Formasaun Profisionál no Empregu nian”, Rogerio de Araujo Mendonça informa iha nia diskursu iha Hotel Novo Turismo, ohin.
Nia dehan, SEFOPE nia área prioridade tolu mak hanesan formasaun profisionál, empregu no ida mak traballu.
“Hahú husi 2009, ita hatene katak ita halo MoU ho nasaun Koreia, ita prepara ona ita-nia trabaladór iha ne’eba, hamutuk 6.808 mak servisu iha ne’eba, iha tinan 2012, ita halo MoU ho Governu Austrália ita-nia traballadór mak servisu iha Austrália hamutuk 17.855 no traballadór ne’ebé mak servisu iha Japaun hahú husi oitavu Governu mai to’o Nono Governu Konstinuasaun hamutuk 25, maibé ida-ne’e mós la taka dalan ba ita atu bele hetan servisu, tanba ne’e agora ita prepara no halo hela formasaun, nune’e ita halo rekrutamentu ba formadór sira ne’ebé mak mai husi ema Japaun rasik ho ita-nia fasilidade ne’ebé mak iha maske limitadu, entaun ita halo rekrutamentu mós tuir nesesidade ita iha”, nia relata.
Nia afirma, Governu sei halo kooperasaun ho Nova Zelandia, espera katak iha fulan-Marsu asina MoU atu loke oportunidade ba joven sira atu halao servisu ba.
Iha fatin hanesan, Diretór Ezekutivu SEFOPE, Paulo Alves, dehan semináriu ne’e importante tebes tanba Governu da-haat nia tempu prodús ona polítika nasionál estratejia ba empregu 2011-2030 no polítika ida-ne’e liga makas ho planu estratéjiku dezenvolvimentu nasionál.
“Ita hotu hatene katak polítika estratejia desenvolvimentu nasionál ne’e husi 2011-2030, ita-nia esforsu ne’e atu hatun ema kiak husi ninia rendimentu to’o mediu altu, entaun programa ida-ne’e mós liga ba iha ne’eba, entaun ita boot sira hatene ita-nia taxa dezempregu no mós sai kauza boot hodi afeta to’o 2030, pelumenus ita-nia taxa dezempregu tun ona ba 5%”, Paulo Alves dehan.
Paulo haktuir, Governu konstituisionál atuál foin estabelese semináriu ida-ne’e, foku makas liu ba polítika re-intregasaun nian, tanba Governu anteriór seidauk estabelese departamentu ida-nee. Entaun objetivu husi polítika re-integrasaun ida-ne’e, oinsá mak Governu valoriza trabalhadór sira ne’ebé mak servisu iha Austrália no rai seluk, ne’ebé mak fila fali mai sira iha rendimentu sira iha osan oinsá sira bele halo negósiu fila fali iha rai laran.
“Se sira jere sira-nia negósiu bele kria kampu servisu ba timoroan seluk, ita bele redús taxa dezempregu 11% ba tun liu tan, tanba ne’e, SEFOPE halo polítika kona-ba responsabilidade ba liña ministériu hotu atu kontribui ba kriasaun taxa dezempregu iha rai laran ida-ne’e”, nia konklui.
Jornalista : Felicidade Ximenes
Editór : Zezito Silva
