FONGTIL husu PNTL liberta estudante UNTL

DILI, 13 dezembru 2024(TATOLI)–Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, husu autoridade Polísia Nasionál Timor-Leste (PNTL) atu liberta totál estudante sira-ne’ebé hetan detensaun iha kampus Universidade Nacional Timor Lorosa’e (UNTL) no FONGTIL lamenta tebe-tebes ho atuasaun Polisia nian.

“Ami la preokupa problema entre reitór no dosente no estudante. Sira iha autoridade rasik atu rezolve sira-nia problema ho pasifiku no diálogu hodi buka solusaun. Ami lamenta tebes Polisia bele halo intervensaun hodi kaer no halo torturasaun no lori ba sela detensaun. Ami husu atu liberta sira totalmente ohin atu labele fó espasu impede ba liberdade espressun iha Timor-Leste,” nia hato’o sujestaun ne’e relasiona ho atuasaun PNTL nian kinta (12 dezembru 2024) horisehik iha kampus UNTL hodi detein estudante sira.

Universitariu ne’e fonte ida-ne’ebé promove kona-ba liberdade espresaun. Se Polisia halo intervensaun ka atuasaun sein limitasaun mak aktu ida-ne’e sei fó ameasa ba liberdade espresaun.

“Entaun, ami husu tebes atu liberta totál ita-nia maluk sira-ne’ebé tama hela iha sela detensaun no bele promove diálogu. Joven tenke kriativu, preokupasaun iha tenke buka dalan hodi rezolve. La’ós uza forsa atu halo atuasaun ho atu brutalizmu baku no kaer ne’e labele,” nia dehan.

Nia esplika, joven tenke livre no halo kritiku, se sala ruma tenke orienta sira ho di’ak tanba sira mak estafeta ba funsionamentu Estadu ba futuru.

Nia sujere, atu labele prega buat ruma ba sira tanba sira bele lakon esperansa ba instituisaun Estadu sira.

“Ami-nia rekomendasaun, liberta sira no promove diálogu,” nia dehan.

Jornalista : Jesuína Xavier 

Editór       : Cancio Ximenes