DILI, 13 dezembru 2024 (TATOLI) – Diretór Jerál Governasaun Lokál iha Ministériu Administrasaun Estatál, António Guterres, informa, eleisaun ba suku foun rua iha munisípiu Aileu sei realiza iha janeiru 2025.
“Diploma ministeriál sai tiha ona, ba iha suku foun hodi hili xefe suku sira,” responsavel ne’e hato’o ba TATOLI, liuhosi telefone.
Diretór jerál hateten iha fulan ida-ne’e nia laran sei hahú prosesu sensibilizasaun ba iha prosesu estabelesimentu suku foun.
Nune’e mós Governu sentrál sei halo reuniaun ida ho autoridade munisipál atu ko’alia kona-ba prosesu no preparasaun ba eleisaun.
Iha sorin seluk, Prezidente Autoridade Munisipál Aileu, hateten, João Bosco dos Santos, rezolusaun ne’e aprova tiha ona.
“Rezolusaun (dekretu lei) ne’ebé aprova ona ba suku foun iha Postu administrativu Remexiu mak suku Karsila no Aileu Vila mak Saril,” nia relata.
Administradór ne’e dehan iha númeru populasaun ne’ebé prenxe rekezitu atu harii suku foun iha postu administrativu rua ne’e.
“Rekezitu ida mak suku foun tenki iha populasaun liu 1.000,” autoridade munisipál ne’e dehan.
Tuir Prezidente totál populasaun ba iha kada suku ne’e besik-2.000, tanba ne’e mak prenxe rekezitu no iha rekursu umanu rasik ne’ebé sei tama ba faze preparasaun, molok hahú eleisaun suku.
Jornalista: Jesuína Xavier
Editór: Cancio Ximenes
