DILI,13 dezembru 2024 (TATOLI)—Sentru Formasaun Téknika Komunikasaun (SEFTEK) hala’o serimónia atribuisaun sertifikadu ba formandu 383 ne’ebé konklui ona formasaun iha nível nasionál no munisípiu sira.
SEFTEC nu’udar sentru formasaun téknika iha komunikasaun ne’ebé tutela ba Sekretaria Estadu Komunikasaun Sosiál (SECOMS) iha Ministériu Presidénsia Konsellu Ministru ho nia kna’ar prinsipál mak fó formasaun ba profisionál sira husi setór públiku no privadu iha área komunikasaun sosiál nian.
“Formasaun ida ne’e iha nível nasionál no mós realiza formasaun iha nível munisipál sira hanesan Lautem, Baucau, Ermera, Manufahi no Bobonaro, entaun ha tinan ne’e SEFTEC prodúz formadu kualifikasaun nível nasionál no munisípiu hamutuk ema na’in 383; ma ne 211 no feto 172,” Diretór SEFTEC, Julio Lopes dehan iha nia diskursu iha salaun CNE Larigutu, ohin.
Diretór Julio esplika, ba tinan ne’e SEFTEC realiza formasaun iha nível nasionál ba unidade formasaun hitu ne’ebé iha no formasaun ba nível munisípiu ba unidade formasaun rua mak hanesan, formasaun komunikasaun relasaun públika no servisu protokolu, no unidade formasaun multimedia.
“Formadu hirak ne’e, ba formasaun nível nasionál husi unidade formasaun komunikasaun relasaun públika no servisu protokolu hamutuk ema na’in 66, Multimédia ema na’in-43, unidade hakerek imprensa hamutuk 40, unidade formasaun televizaun na’in-19, unidade formasaun lian tetun Jornalizmu na’in 27, unidade formasaun rádiu ema na’in-16 no unidade jestaun komunikasaun iha situasaun krize ema na’in-15,” nia relata.
Iha fatin hanesan, Sekretariu Estadu Komunikasaun Sosiál (SEKOMS), Espedito Dias, hateten daudaun ne’e ema moris iha teknolojia avansadu tebes no moris iha era dijitál nia laran, tanba ne’e iha buat hotu modernu.
“Ho mundu avansadu teknolojia ida-ne’e la’ós jornalista sira mak sai produtór ba informasaun maibé ita hotu akonpaña katak iha ema ida idak iha telefone Android bele sai produtór ba informasaun no nia konsekuénsia mak lori vantajen no desvantajen ba ita,” Expedito afirma.
Tanba ne’e nia husu ba formandu sira ne’ebé mak servisu iha instituisaun Estadu sira nune’e bele implementa saida mak sira aprende ne’e ba iha ida idak nia servisu fatin sira.
Nune’e formanda, Lenia Fernandes Soares,agradese ba parte Seftec ne’ebé fó ona formasaun kona-ba unidade radio nian tanba hanesan joven ida presiza aprende diak liu tan hodi bele kontribui ba estadu.
“Formasaun ida-ne’e durante fulan tolu no estajiu fulan ida, entaun tempu ida-ne’e sufisiente tebes hodi ha’u aprende iha unidade rádiu nian,” Lenia Fernandes Soares informa.
Entertantu, formasaun kualifikasaun nasionál, SEFTEC mos hala’o formasaun iha munisípiu ho unidade formasaun rua, unidade Komunikasaun Relasaun Públika no Servisu Protokolu no unidade Multimedia.
Formasaun iha munisípiu ba tinan ne’e halo iha munisípiu lima hanesan unidade komunikasaun relasaun públika no Servisu Protokolu hala’o formasaun iha munisípiu tolu Munisípiu Lautem ho totál formadu 28, Baucau ho formadu 30 no Munisípiu Ermera formadu 31.
No, unidade Multimédia halao formasaun iha Munisípiu rua Munisípiu Manufahi ho totál formadu 36 no Munisípiu Bobonaro ho formandu 32.
Seremónia atribuisaun sertifikadu ne’e ba formadu sira ne’ebé tuir ona formasaun ho karakter kualifikasaun nasionál ho kompeténsia Téknika Komunikasaun Nível I – IV, ho karga oráriu formasaun oras 300 – 1200, no formandu sira ne’ebé partisipa iha formasaun ho karakter share skill (fahe abilidade) ne’ebé realiza iha munisípiu sira.
Formasaun teória no prátika, tuir regulamentu SEFTEC, formandu sira kualifikasaun nasionál tenke kompleta ho estájiu profisionál fulan ida iha instituisaun Estadu nian sira no media privadu sira.
Jornalista : Felicidade Ximenes
Editór: Rafael Ximenes de A. Belo
