OÉ-CUSSE, 13 Dezembru 2024 (TATOLI) – Fundu Nasaun Unida ba Populasaun (UNFPA) planeia atu harii Sentru Kuidadu Emerjénsia Obstétriku no Neonatál-Bázika (KEmON-B) unidade 20 iha munisípiu 12, esetu Ataúro no Liquiçá.
Jerente ba Programa Saúde Reprodutiva iha UNFPA, Triana de Oliveira, informa katak durante 2024, UNFPA kontinua apoia Ministériu Saúde ho tulun husi Governu Austrália no konsege estabelese ona Sentru KEmON-B unidade neen iha munisípiu neen.
“Agora iha Oé-Cusse, ita estabelese iha sub-rejiaun Pássabe. Planu tinan oin, UNFPA iha kompromisu ho apoia husi Governu Japaun sei eleva tan Sentru KEmON-B 20 iha munisípiu 12 la inklui Ataúro ho Liquiçá”, nia adianta.
Jerente ne’e esplika katak antes estabelese sai Sentru KEmON-B, persiza asegura pilár tolu ne’ebé importante ba maternidade ne’ebé atu eleva hodi fornese ba Kuidadu Emerjénsia Obstétriku ba inan no bebé foin moris.
“Primeiru mak presiza iha pesoál saúde treinadu iha instalasaun saúde no tenke iha médiku no parteira treinadu atu fó atendimentu emerjénsia ba inan no bebé. Daruak mak presiza iha ekipamentu médiku no non-médiku, nomós supplay hirak-ne’ebé nesesita ba iha sentru referidu, inklui livru rejistu no seluk tan”.
Notísia relevante: INSPTL destaka profisionál saúde haat ho funsaun hitu iha Sentru KemON-B Pássabe
Nia salienta katak presiza mós iha funsionamentu infraestrutura husi maternidade ne’e rasik, liuliu bee-moos no eletrisidade, nune’e infraestrutura ne’e bele funsiona oras 24 nia laran no pesoál saúde sira treinadu mós bele fornese atendimentu Sentru KEmON-B durante oras 24 nia laran.
Jornalista: Abílio Elo Nini
Editora: Maria Auxiliadora
