Família-Veteranu entrega restu mortál saudozu na’in-317 ba Uma Mahon Uatulari
VIQUEQUE, 16 dezembru 2024 (TATOLI)- Família no veteranu husi suku neen iha postu administrativu Uatulari, munisípiu Viqueque, segunda ne’e, entrega saudozu sira-nia restu mortál na’in-317 ba Uma Mahon Postu Uatulari, munisípiu Viqueque hodi hein Estadu no Governu hodi halo’ot.
Prezidente Komisaun rekolla restu mortál, postu Uatulari, Tomas Soares da Silva, hateten, prosesu independénsia naruk tebes hahú husi tinan 1975 povu barak mak envolve ba luta hodi kontra invasaun Indonézia ne’ebé okupa nasaun Timor Leste. Iha faze prosesu ba ukun rasik-an, família balun mate tan funu, balun rekolla no balun seidauk, nune’e komisaun rekolla restu mortál hasai insiativa hamutuk ho martir sira-nia família hodi hahú rekolla restu mortál faze dahuluk to’o agora tama ona ba faze dahaat.
“Ita-nia eroi sira-ne’e maka nu’udar luta na’in tanba lakon vida. Tanba ne’e, ita fó gloria no onra ba ita-nia eroi no martir sira no iha Uma Mahon Uatulari. Ita rekolla hamutuk tau iha uma mahon hodi hein prosesu husi Estadu no Governu ba halo’ot fatin dignu jardín eroi”, Veteranu ne’e hateten iha serimónia entrega restu mortál iha uma mahon, Uatulari, ohin.
Tomas hatutan, restu mortál faze dahaat ne’ebé komisaun no família halo’ot saudozu sira mate ba rai ida-ne’e tanba funu nia-hahalok tenke husik família sira.
Saúdozu na’in-337 ne’ebé komisaun no família rekollla kompostu husi komadante na’in-4 hanesan saúdozu Sebastião Alves da Silva “Ambasa”, saudozu Adelino de Carbalho “Umu Sege”, saudozu João de Menezes “Daraloi”, saudozu Luis Miguel “Titi Rubik”, militár no ema sivil ne’ebé mate iha tempu okupasaun Indonézia.
Prosesu rekolla hahú faze dahuluk komisaun rekolla na’in-118, faze daruak rekolla hamutuk 273, faze datoluk na’in-580 ho totál 971 maka daudaun rai iha Uma Mahon, postu Uatulari.
Enkuantu, tuir dadús saudozu sira-ne’ebé rekolla ba faze dahaat ne’e ho totál 339, maibé saúdozu na’in-22 restu mortál mak família seidauk rekolla tanba liga ba kultura, nune’e iha faze dahaat rekolla 317, nune’e aumenta faze dahaat ne’e restu mortál 1. 288.
Iha fatin hanesan, Reprezenta Konsellu Kombatente Libertasaun Nasionál (CCLN,sigla Portugés) husi nasionál, Ilda da Conceição, husu obrigadu ba saudozu sira nia-família no komisaun rekolla restu mortál ne’ebé esforsu rekolla saudozu sira-nia restu mortálhodi halibur hamutuk iha uma mahon Uatulari.
“Ami hato’o sentidu profunda ba erois sira hotu ne’ebé halibur ona iha Uma mahon. Nune’e saudozu sira-nia restu mortais iha ona uma mahon, ita hein hotu prosesu banhira mak estadu haloot iha jardín erois ne’ebé lokaliza iha suku Uma Uain Leten”, Ilda hato’o.
Reprezenta família husi saudozu, Cecilio Alves da Costa Belo, husu agradese ba komisaun rekolla restu mortál Uatulari.
“Ami família sente triste tanba laiha membru Governu ruma mak marka presenza, saudozu sira-ne’e lakon vida tanba luta ba libertasaun. Tan ne’e maka ami konvida na’in-ulun sira, maibé sira la mai partisipa”, nia lamenta.
Jornalista : Vitorino Lopes da Costa
Editór : Florencio Miranda Ximenes
