COVALIMA, 16 Dezembru 2024 (TATOLI) – Formandu na’in-46 husi Canossa Vocational Training Center (CVTC) iha Suai-Covalima, ne’ebé tuir kursu administrasaun, ospitalidade no komputadór báziku simu setifikadu.
Serimónia atribuisaun sertifikadu ba formandu sira ho tema “Forma ema sai ema, kakutak, fuan no hahalok” ne’e realiza iha salaun parokiál Suai.
Reprezentante Sekretáriu Estadu Formasaun Profisionál no Empregu (SEFOPE), Geraldo Moniz, dehan SEFOPE iha tanba ezijénsia joven sira oinsá mak atu redús taxa dezempregu tuir nesesidade merkadu nian.
“Ita-boot sira ne’ebé ohin simu sertifikadu liuhusi prosesu ne’ebé ohin remata ona formasaun durante tinan ida iha sentru formasaun akreditadu CVTC, Suai, iha área sira hanesan ospitalidade, administrasaun no komputadór báziku nivel I to’o II”, Geraldo Moniz dehan.
Nia salienta katak Governu apoia sentru formasaun ba joven sira ne’ebé hakarak tuir treinamentu ho objetivu oinsá mak ita bele redús taxa dezempregu no nia fó hanoin ba joven sira labele para hodi tuir formasaun sira.
Geraldo Moniz mós husu formandu sira atu aproveita oportunidade hodi kontinua aprende no esforsu nafatin hodi buka serbisu, nune’e bele aplika matenek sira ne’ebé hetan iha sentru formasaun.
Hodi hatutan SEFOPE iha esperansa boot ba sentru formasaun akreditadu sira hodi forma sira depende ba nesesidade merkadu nian, nune’e hafoin remata formasaun sira bele hetan serbisu.
“Ita haruka joven sira tuir formasaun depende ba merkadu. CVTC-Suai forma ema sai ema ho disiplina, tanba forma ema nia atitude presiza ho tempu”, dehan.
Diretora-Ezekutiva CVTC-Suai, Madre Maria de Carvalho Soares, salienta serimónia graduasaun ne’e ba-15. “Ita hakarak oferese nafatin formasaun hodi fó oportunidade ba Covalima-oan sira aleinde mós ba munisípiu sira seluk, tanba hafoin formandu sira remata formasaun balun hetan kedas serbisu hodi tulun sira-nia família no sosiedade hodi redús númeru dezempregu”, nia realsa.
Formandu Dencia Fernandes Lopes agradese ba formadór sira ne’ebé durante tinan ida fahe ona matenek ba sira iha sentru formasaun iha Covalima. “Agradese ba formadór sira ne’ebé durante ne’e fahe sira-nia matenek mai ami. Ohin loron ami bele finaliza ona ami-nia formasaun iha área ospitalidade, administrasaun no komputadór báziku”, nia reitera.
Formandu sira ne’ebé tuir formasaun iha CVTV-Suai mai husi munisípiu Dili, Ainaro, Liquiçá no Covalima.
Notísia relevante: SEPFOPE atribui sertifikadu ba estudante 47 iha CVTC Suai
Jornalista: Celestina Teles
Editora: Maria Auxiliadora
