Kondisaun estrada aat difikulta komunidade Bahatata lori produtu lokál ba merkadu
VIUQEUQE, 16 dezembru 2024 (TATOLI)-Kondisaun estrada husi Postu Administrativu Uatucarbau liga ba suku Bahatata, aat hodi difikulta komunidade atu lori produtu lokál ba merkadu no empreza sira atu distribui mobiliáriu ba uma Naroman ba Povu.
“Estrada ne’ebé liga mai ami-nia suku ne’e sai difilulta ba programa dezenvolvimentu liuliu PNDS hanesan mobiliáriu, semente, besi la hato’o iha suku. Tanba kondisaun dalan ne’e rai-udan hela de’it, nune’e dalan nakonu ho tahu. Entaun karreta sira labele asesu to’o iha ami-nia suku”, Xefe suku Bahatata, Patrício Maria Pinto, hateten ba TATOLI, iha postu Viqueque Vila, ohin.
Autoridade lokál ne’e hatutan, kondisaun estrada la’ós difikulta de’it ba prosesu dezenvolvimentu iha suku Bahatata, maibé difikulta mós ba komunidade sira sosa foos no nesesidade sira seluk.
“Karreta sira faan sasán agora mai la to’o iha ami-nia suku ne’ebé obriga komunidade sira tenke la’o ain ba suku Loihulu no Bagia, hafoin sosa nesesidade báziku depois lalin la’o de’it kuaze kilometru tolu”, nia lamenta.
Preokupasaun ba estrada ne’e, nia afirma autoridade relata beibeik ona ba Ministériu Obra Públika (MOP) no ekipa tékniku mai haree direta ona, maibé to’o agora seidauk hadi’a.
“Iha ne’e ami la preokupa ona ba bee-moos, eletrisidade, saúde no edukasaun. Ami-nia preokupasaun durante ne’e maka estrada, ami hakarak Governu hadi’a lalais estrada, nune’e labele prejudika ba ami-nia povu”, nia sujere.
Ho kondisaun estrada nia dehan, prejudika progresu konstrusaun sira-ne’ebé dadauk ne’e sei la’o hela iha suku Bahatata hanesan morru protesaun ba postu saúde foin atinje 50%, konstrusaun edifísiu Pre-Eskolár atinje 50% no mini merkadu atinje 25%.
Suku Bahatata iha uma-kain 201 no totál abitante 922. Abitante hirak-nee’ mai husi aldeia haat komposta husi aldeia Builakurae ho totál abitante na’in-202.
Nune’e mós abitante aldeia Uai-Mare totál na’in-337, abitante husi aldeia Tata Dere hamutuk 270 no aldeia Nelu-Uai abitante hamutuk 112.
Jornalista : Vitorino Lopes da Costa
Editór : Florencio Miranda Ximenes
