DILI, 16 dezembru 2024 (TATOLI) – Ministériu Administrasaun Estatál (MAE) sensibiliza dekretu-lei nú. 84/2023 ba Autoridade Munisipál sira no kargu xefia sira hodi hatene kle’an sira nia kompeténsia servisu hodi halo atendimentu públiku ho di’ak.
Ministru Administrasaun Estatál, Tomás do Rosário Cabral, esplika autoridade sira tenki uza sira-nia kompeténsia, tanba dekretu-lei nú. 84/2024 ita fó kompeténsia ba sira. Ezekusaun orsamentu inferiór rihun $500 ne’e iha autoridade munisipál nia liman.
“Tanba ne’e ami konvoka autoridade munisipál no kargu xefia sira hodi partisipa formasaun loron haat. Sira-nia papél atu fó apoiu tékniku ba asuntu sosiál no planeamentu iha baze. Programa Nasionál Dezenvolvimentu Suku iha sira-nia liman. Tanba ne’e presiza formasaun espesifiku ba ezekusaun. Orsamentu ezekusaun la liu ona husi MAE,” Ministru hateten ba jornalista sira, iha salaun INAP Comoro, Dili, ohin.
Governante ne’e hateten, Programa Merenda Eskolár iha autoridade munisipál sira-nia liman ho orsamentu, oinsá mak merenda eskolár ne’e bele la’o, merenda eskolár tenki inklui produtu lokál ho kuantidade 75%, entaun servisu munisipál mak tenki iha planu atu organiza servisu sira ne’e.
Nia husu ba autoridade munisipál no xefia atu hatene asuntu sosiál sira hanesan populasaun hira, ema ho defisiénsia hira, ema ho terseira idade hira no asuntu agrikultura, saúde, edukasaun no seluktan.
Ministru mós hato’o katak hakarak autoridade munisipál sira halo koordenasaun di’ak ho ministériu sira seluk kona-ba projetu sira ne’ebé hala’o iha kada munisípiu.
Iha fatin hanesan, Prezidente Autoridade Munisipal Lautem, Melio de Jesus, hateten, formasaun ba loron haat ne’e importante tebes diretór sira bele hala’o knar ho di’ak.
“Importánsia husi atu ita autoridade munisipál ho diretór sira hala’o kna’ar no kompeténsia tuir dekretu-lei nú 84/2023,” nia dehan.
Jornalista: Jesuína Xavier
Editór: Cancio Ximenes
