DILI, 16 dezembru 2024 (TATOLI)—Ministru Ensinu Superior Siénsia no Kultura (MESSK), José Honório da Costa Pereira Jerónimo, husu ba estudante Universidade Nasionál Timor-Lorosa’e (UNTL) atu lori Reitór bá Komisaun Antí-Korrupsaun (CAC, sigla portugés) karik iha evidénsia forte.
Ministru hato’o kestaun ne’e tanba antes ne’e estudante sira husi UNTL halo manifestasaun hasoru Reitór kona-ba osan kaixa ne’ebé mak kada tinan estudante sira kontribui.
“Sim, UNTL iha Reitór no iha Vise-Reitór sira , ne’ebé ha’u hanoin sira bele rezolve problema ida-ne’e. Se estudante sira iha evidénsia forte katak Reitór ho nia estrutura halo buat ne’ebé la loos CAC iha hela, bele lori bá CAC hodi halo investigasaun,” governante ne’e hateten iha Palásiu Governu, segunda ne’e,
Nia fó hanoin ba estudante sira atu hatene katak UNTL nu’udar Universidade públiku ne’ebé iha ema intelektuál barak, nune’e la limita estudante sira atu halo manifestasaun maibé nafatin tau an nu’udar ema intelektuál.
“Ita bele halo manifestasaun tanba Konstitusaun RDTL la bandu, maibé tenke hatudu nafatin katak ema intelektual ne’e importante, aban ha’u sei hasoru Komisaun G hodi ko’alia kona-ba asuntu UNTL nian, ne’ebé estudante sira demo, maibé hanesan Ministru husu nafatin atu demo ho di’ak, la bandu, maibé respeita nafatin estrutura UNTL,” nia akresenta.
Notísia relevante : AAE-UNTL ezije reitór ho estrutura atu buka solusaun ba problema universidade
Governante ne’e husu atu halo serbisu ho responsabilidade nune’e bele lori universidade ba oin.
“Atu troka Reitór ka la troka, Vise-Reitór mós mai la halo milagre ida, tenke serbisu mak bele lori instituisaun ba oin. Nune’e nafatin hatete ba estudante, katak imi iha direitu atu hato’o buat ruma maibé respeita nafatin instituisaun no regra demokrátiku sira tenke la’o nafatin,” nia katak.
Kona-ba avaliasaun dezempeñu ba reitória UNTL, MESSK dehan, to’o ohin loron Reitór ho nia estrutura la’o di’ak hela, parese iha dezentendementu ba-malu ka la aseita malu ho buat ruma.
“Klaru UNTL ne’e tutela mai MESSK maibé sira autonomia atu deside saida mak sira bele halo, tanba sira iha nia orsamentu ketak, Ministériu tau matan nafatin, agora ein relasaun ho manifestasaun estudante sira, país demokrátiku ema iha liberdade hato’o sira-nia ideia no hanoin maibé tenke respeita nafatin instituisaun tanba ne’e ita respeita nafatin instituisaun respeita orden públiku, tanba la’ós estudante hotu-hotu halo manifestasaun, balun hakarak aula, ne’ebé tenke respeita mós ema seluk ninia hakarak,” nia tenik.
Jornalista : Osória Marques
Editora : Julia Chatarina
