PR Horta: tais mak Timor-Leste nia patrimóniu kulturál
DILI, 16 dezembru 2024 (TATOLI) – Prezidente Repúblika, José Ramos-Horta, hato’o nia mensajen ba loron nasionál tais hodi konsidera “tais mak Timor-Leste nia patrimóniu kulturál”.
“Ita selebra loron nasionál Tais, ita-nia nasaun nia patrimóniu kulturál intangível dahuluk ne’ebé rekoñese husi UNESCO ita fó onra la’ós de’it ba nia textil, maibé esénsia rasik husi ita-nia identidade nasionál,” Dehan Xefe Estadu Ramos-Horta liuhusi nota ne’ebé Agência TATOLI asesu husi media Gabinete Palásiu Prezidensiál, ohin.
Horta dehan, kabas ida-idak husi tais kesi hamutuk timor nia istória sira, matenek husi beiala sira, reziliénsia husi luta sira, glória husi vitória sira, no aspirasaun ba aban-bainrua.
“Ita-nia soru-na’in tais sira, guardiaun ba ita-nia patrimóniu kulturál, predominantemente feto sira ne’ebé hatutan arte sagrada ida-ne’e husi inan ba oan-feto liuhusi jerasaun. Sira nia liman matenek kria la’ós de’it roupa ka sasán dekorativa sira, maibé arkivu moris sira husi ita-nia istória, hodi hatama símbolu no padraun sira ne’ebé ko’alia kona-ba ita-nia komunidade oioin no valór sira ne’ebé ita hafolin”.
Tuir Xefe Estadu, husi foho-lolon nevoadu Ermera nian to’o tasi-ibun moos Lautém nian, rejiaun ida-idak nia padraun Tais ne’ebé úniku refleta karakter espesiál husi komunidade sira enkuantu kesi hamutuk nu’udar nasaun ida de’it.
Kombinasaun armonioza entre diversidade no unidade ida-ne’e mak fundasaun ba Timor-Leste nia forsa.
“Bainhira ita simu modernizasaun, mai ita hanoin katak ita-nia tais reprezenta la’ós de’it ita-nia patrimóniu riku maibé mós ita-nia ponte ba futuru. Liuhusi prezervasaun no promosaun ba artezanatu antigu ida-ne’e, ita bele kria oportunidade ekonómika sustentável sira enkuantu salvaguarda ita-nia autentisidade kulturál,” katak.
PR Horta husu ba sidadaun hotu atu hatais sira-nia Tais ho onra no orgullu. “Mai ita apoia ativamente ita-nia soru-na’in lokál sira, eduka ita-nia oan sira kona-ba signifikadu kle’an husi textil sagradu sira-ne’e, no hatudu beleza estraordinária husi ita-nia Tais ba mundu”, sujere PR Horta.
Tanba ne’e, hein katak espíritu unidade no reziliénsia ne’ebé inkorporadu iha timor nia Tais kontinua hametin lasu nasaun nian.
Rekorda fali katak, iha Organizasaun Nasaun Unidas (ONU) ba edukasaun siensia no kultura rekonese Tais nu’udar patrimonia mundiál iha loron 14 dezembru 2021 no loron nasionál tais aprova ho votu unanimidade bazeia ba rezolusaun Parlamentu Nasionál numeru 2/2020 26 janeiru, institui loron nasionál no aprova rekomendasaun husi Governu hodi halo protesaun no prezervasaun ba Tais.
TATOLI
