DILI, 19 Dezembru 2024 (TATOLI) – Arsebispu Arkidioseze Metropolitana Dili, Dom Virgílio Kardeál do Carmo da Silva, inaugura kapela Nossa Senhora de Lourdes iha Ospitál Nasionál Guido Valadares (HNGV, sigla portugés).
Iha inaugurasaun ne’e arsebispu agradese Ministériu Saúde ne’ebé serbisu maka’as hodi reabilita fatin ne’e ba profisionál saúde no pasiente sira.
Dom Virgílio garante katak kapela sai fatin no sinál esperansa ba familia boot iha ospitál no fatin enkontru moras sira ho Maromak, tanba moras sira toba mesak, presiza mesak no ko’alia ho Maromak.
“Atu ita reflete hamutuk Maromak nia liafuan ne’ebé ohin ita rona hanesan naroman ida, lampra ida ne’ebé leno ita atu komprende kona-ba moris. Saida mak ha’u husik hela ba moris, bainhira ha’u liu husik hela rekordasaun iha rai. Kada pasu no momentu, pasajen ha’u-nia moris, ha’u husik saida, karik la’ós fasil atu hatán, ezije fó resposta no reflesaun séria ida. Se ita la hatán, ita bele dehan loron ida tarde ona” kardeál hateten iha nia omília iha ámbitu inaugurasaun kapela ne’e, iha Bidau, ohin.
Dom Virgílio esplika katak kada momentu ita ema nia moris hanesan osan-mean no grasa ida ne’ebé Maromak fó. “Buat hotu ne’ebé ita halibur no tau hamutuk ne’e iha nia rohan, tanba sasán barak nia leet, ita la hakmatek. Hanesan salmonista dehan o lalika hakfodak ida ne’ebé hariku nia aan, bainhira mate sei la lori buat ida, ne’e realidade ida. Lalika laran-moras ida, bainhira ema iha buat barak”.
Iha sorin seluk, Diretora Servisu Administrasaun, Finansa no Lojístika, Sara Maria Xavier, hateten kapela ida ne’e importante tebes hodi halo parte iha HNGV hodi fó asistensia ba pasiente sira no família, liuliu asisténsia espirituál hodi fó sakramentu sira batizmu, matrimóniu no mina sarani nian.
Dirijente ne’e dehan kapela ne’e reabilita husi empreza Builelo Unip. Lda. ho valór orsamentu ba obra ne’e besik rihun $47 ho durasaun fulan tolu, entre Agostu no Outubru, no estende tan ba fulan-Novembru ne’ebé empreza entrega iha semana kotuk no halo inaugurasaun ohin.
Jornalista: Jesuína Xavier
Editora: Maria Auxiliadora
