DILI, 20 dezembru 2024 (TATOLI) – Enkarregadu Asuntu Repúblika Índia mai Timor-Leste, Arindman Banerjee, sesta ne’e, iha Palásiu Prezidensiál Dili, hasoru malu ho Prezidente Repúblika, Jose Ramos-Horta hodi ko’alia kona-ba kooperasaun entre Índia no Timor-Leste, hodi hasa’e dezenvolvimentu di’ak liuliu iha identifikasaun dijitál.
“Ohin, ami ko’alia kona-ba asuntu importante sira relasiona ho relasaun bilaterál no diplomátika entre Índia no Timor-Leste, no ami mós ko’alia kona-ba Prezidente José Ramos-Horta nia vizita ba Banglades iha semana kotuk. No Prezidente Ramos-Horta mós ko’alia kona-ba diskusaun oioin ne’ebé hala’o durante vizita ba Banglades, no-mós ko’alia kona-ba planu atu vizita Índia hodi haree ba oportunidade iha diskusaun sira seluk kona-ba projetu bilaterál sira, oinsa atu haree kona-ba identifikasaun dijitál,” Arindman Banerjee hateten hafoin remata enkontru ho Xefe Estadu.
Nia dehan, dadaun ne’e India haree hela projetu bo’ot balun, liu-liu projetu digitál ID, tanba Timor-Leste iha hela prosesu dezenvolvimentu infraestrutura.
“Ami haree hela projetu xave balun, liuliu projetu ID dijitál, ne’ebé iha hela prosesu dezenvolvimentu infraestrutura iha Timor-Leste. Iha fulan oin mai no tinan oin Índia no Timor-Leste bele servisu hamutuk hodi hasa’e dezenvolvimentu dijitalizasaun ba marka identifikasaun di’ak liu iha futuru,” nia tenik.
Aleinde ne’e, Índia mós sei apoia infraestrutura Timor-Leste nian liuhosi aumenta médiku sira ne’ebé kualifikadu.
“Kona-ba infraestrutura iha Timor-Leste, ami hahú buka estudante medisina iha universidade sira atu iha médiku ne’ebé kualifikadu, tanba ne’e ami ko’alia kona-ba tópiku barak iha enkontru ohin,” nia dehan.
Iha enkontru ne’e, Prezidente Repúblika, José Ramos-Horta hato’o parabéns ba Primeiru-Ministru Índia no husu nia atu vizita Timor-Leste iha tinan oin mai.
“Ha’u sei ko’alia ho Kuartél-Jerál Índia nian kona-ba hala’o vizita ida ho nível aas entre nasaun rua ne’e iha tinan oinmai,” nia katak.
Índia loke ona nia embaixada iha Timor-Leste dezde setembru 2024 no Timor-Leste mós loke embaixada iha Índia, Nova Deli iha fulan-outubru 2024.
Jornalista: Hortencio Sanchez
Editór: Florencio Miranda Ximenes
