DILI, 23 dezembru 2024 (TATOLI) – Ministru Justisa Sergio Hornai kompromete katak instituisaun ne’ebé nia lidera hamutuk ho Xefe Ekipa Grupu Traballu Reforma Justisa, Lucia Lobato, sei halo alterasaun ba estatutu kriasaun Sentru formasaun jurídika judisiária (CFJJ, sigla Portugés) nune’e bele oferese formasaun ne’ebé adekuadu ba kandidatu Majistradu Judisiáriu sira.
Nia dehan, hanesan membru Governu ne’ebé responsavel ba asuntu justisa tau ona iha ajenda ba tinan oin hodi hamutuk ho Ekipa Grupu Traballu Reforma Justisa oinsá diskute lei sira ne’ebé presiza halo alterasaun inklui lei estatutu kriasaun sentru formasaun jurídika judisiária atu nune’e bele fó formasaun ne’ebé di’ak ba kandidatu Juíz kandidatu Ministériu Públiku inklui kandidatu Defensór Públiku sira.
“Hanesan governante konsidera ida-ne’e sai hanesan ita hothotu nia preukupasaun, oinsá mak ita bele iha servisu sentru formasaun jurídiku ne’ebé kualidade, nune’e bele absolve ita-ninian futuru ba Juíz, Prokuradór Defensór, Advogadu no Ofisiál Justisa inklui sira seluk-seluk iha órgaun polísia kriminál ninian. Ita hakarak sentru formasaun jurídika judisiária ne’ebé exelente hodi prepara ita-nia asesór jurídiku ne’ebé ho kualidade ba timorizasaun ba iha futuru.Tanba ne’e mak hakarak ka lakohi ita presiza duni hadi’a di’ak liután ita-nia lei sira hodi fó biban ba sentru formasaun hodi fó formasaun ne’ebé kualifikadu,” Sergio Hornai hateten ba jornalista sira hafoin partisipa seremónia despedida ba kandidatu Majistradu Judisiáriu na’in-24 ne’ebé atu kontinua sira-nia formasaun durante tinan ida iha Portugal, iha auditoria Ministériu Justisa, Colmera segunda, ohin.
Governante ne’e dehan, Sentru formasaun jurídika judisiária ne’ebé mak agora daudaun eziste ne’e fó ona formasaun lubuk ida ba timoroan iha setór justisa.
“Maibé, ita presiza reforsa liután iha infraestrutura, iha rekursu umanu ida, que naton para nune’e sira bele iha kbiit ida-ne’ebé naton hodi hatan ba iha situasaun, evolusaun no ita-nia demanda ka ejizénsia ne’ebé mosu komunidade,” nia adianta.
Membru governu ne’e dehan, kuandu forma ema ho kualidade nakonu ho étika deontolojia, nakonu ho integridade entaun sira sei dezenvolve karreira iha ninia servisu fatin.
Iha fatin hanesan, Xefe Ekipa Traballu ba Reforma Justisa, Lucia Lobato hateten, presiza halo alterasaun ba estatutu Sentru Formasaun Jurídiku judiáriu para mellora di’ak liután formasaun iha sentru formasaun jurídika judisiária para prepara kandidatu majistradu judisiáriu, Ministériu Públiku no Defensór Públiku inklui forma kamada sira seluk iha setór Justisa ho kualidade.
Tuir nia katak, Sentru formasaun jurídika judisiária agora difikulta formasaun oinsá atu prepara majistradu judisiáriu sira tanba kestaun lei sira ne’e mak ladun di’ak, entaun tempu ona halo alterasaun ba lei sira sentru formasaun para bele aposta ba kualidade.
“Ita presiza hadi’a lei sira sentru formasaun nian, presiza hadi’a kurríkulu sentru formasaun nian, apoia ekipamentu no harii infraestrurura ne’ebé adekuadu, edifísiu sentru formasaun ita presiza hadi’a. Tanba ne’e, tinan oin, ha’u ho Ministru Justisa sei haree asuntu ne’e,” nia afirma.
Antiga ministra justisa ne’e dehan, Governu da-sia mai ho komprimísiu atu halo reforma ba setór justisa hodi reforsa servisu setór justisa la’o di’ak liután iha futuru.
“Espera mandatu IX Governu Konstitusionál ne’ebé mai ho hakarak ida reforma justisa tenke halo duni reforma ida-ne’ebé di’ak para forma ema ho kualidade,” nia konklui.
Jornalista: Natalino Costa
Editór: Rafael Ximenes de A. Belo
