Natal hatudu Maromak nia domin iha balada han fatin

DILI, 24 dezembru 2024 (TATOLI)–Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten, Natál hatudu rahun di’ak ka grasa Maromak nia domin ne’ebé hatudu iha prezepiu kosok oan moris iha balada nia han fatin, tanba Maromak nia grasa mak mosu mai no rahun di’ak ba ida-ne’ebé mai lori salvasaun ba umanidade tomak.

“Rahun di’ak mak Maromak nia domin ne’ebé transforma ka nakfilak, domin ne’ebé renova istoria, liberta buat aat ka eskravidaun, domin ne’ebé lori dame no ksolok. Kalan Natál Maromak hatudu nia domin ba ita liuhusi nia oan Jesus, ida-ne’ebé aas hotu-hotu maibé hatene haraik aan no halo nia aan kiik ne’ebé ita hare iha prezepiu,” Dom Virgílio kardeál hateten ba sarani sira iha omilia iha misa kalan Natal nian iha Igreja Katedral Immaculada Boceição, Díli, tersa ne’e.

Jesus ema hare kosok oan no ema hotu hakarak kaer no kous no hakuak, halo nia aan kiik atu ema besik no iha proximidade ida-ne’e la’ós mai hanesan liurai, tanba São Paulo dehan Maromak ida mai ne’e rahun di’ak ka grasa ida.

“Uluk knana’in, Maromak fó gratuitu, Maromak iha domin ne’ebé ema la negósia, maske ema la soi atu simu, la rekompensa. Tanba, nia mizeria hanesan na’in feto hateten iha anunsiasaun. Kalan Natal ida-ne’e, Maromak hanoin ita no hadomi ita ida-idak iha momentu ne’ebé Ita sente dook no aat, Na’in Maromak iha ne’ebá. Ohin kalan, Maromak dehan, ha’u hadomi ó, maske ita sente folin laek,” nia dehan.

Dalabarak iha sirkunstánsia ne’ebé halo ema dook husi Maromak, maibé Maromak nunka fó kotuk ba nia oan sira, Maromak hakarak ema ida-idak nia di’ak main sarani sira ida-idak mak dúvida sira-nai domin ba Maromak. Ida-ne’e mak dom no prezente ne’ebé ema deskobre iha kalan Natal katak buat ne’ebé Maromak fó ne’e gratuitu.

“Nia moris ki’ak atu konkista rik soin domin nian. Iha grasa ida-ne’e, ita deskobre mós beleza ka furak ita ida-idak ne’ebé lori imajen Maromak ninian. Tanba, tanba Maromak hadomi ita, Nia domin iha ita halo ita furak iha momentu moras, triste maibé ita furak nafatin,” dom Virgílio hateten.

Natál ohin kalan iha Belém ne’ebá, maske Bibi atan sira sente la soi maibé Maromak buka sira, entaun ohin kalan ne’e Maromak buka sarani sira hotu la’os sarani sira mak bua Nia, tanba Nia mak dudu ema nia laran husi laran atu mai tuir misa, envezde tur nonton ka halo buat seluk.

Ema-nia moris dalaruma nakukun iha família, servisu fatin no seluk tan ne’e Maromak konfirma keta tauk, korajen no labele tau iha hanoin hadomi ne’e lakon de’it mo oOhin kalan ne’e domin konkista tauk.

“Maromak buka ita ho nia grasa. Nai Jesus buka tanba nia mak salvadór, entaun husik ita-nia aan Maromak tama no hola parte iha ita-nia moris. Haree ba kosok oan, nia hadomi ita, nia buka, maibé Ita mak dehan tempu laiha. Perguntas ba ita mak ne’e, ha’u husik tempu no oportunidade hodi Maromak hadomi ha’u, Ha’u destinu Maromak salva ida-ne’e grasa no agradese ba domin ba gratidaun ida-ne’e. Ohin, ita hakbesik aan ba prezepiu, Natál ida-ne’e atu fó obrigada ba Maromak,” nia dehan.

Nia husu atu ema hotu simu prezente Jesus rasik no mós sai prezente ba ema seluk hanesan Jesus halo ema kontente.

“Sai prezente katak fó sentidu valoriza no folin ba moris ida-ne’e liuliu foinsa’e sira atu fó nu’udar foinsa’e. Ida ne’e mak dalan ba moris,” nia hateten.

Jornalista : Jesuína Xavier 

Editór      : Cancio Ximenes