DILI, 24 dezembru 2024 (TATOLI)–Irlandés ida-ne’ebé luta ba Timor-Leste nia libertasaun nasionál, Tom Hiland, idade 72, hakotu iis iis iha tuku 12h30 ohin iha Hospital Nasionál Guido Valadares (HNGV), Bidau, Dili.
Sekretáriu Jerál Ministériu Negosiu Estranjeiru no Koperasaun (MNEK), João Câmara, hateten MNEC lakon ema di’ak ida-ne’ebé fó nia kontribuisaun boot iha tempu rezisténsia no ukun rasik aan.
Nia esplika, Tom Hyland ema Irlandia, ema-ne’e ninia dedikasaun luta ba independénsia ne’e boot tebes, ninia kontribuisaun no partisipasaun iha klandestina, no sira-nia grupu servisu hamutuk ho Prezidente atuál no mana Kristy Sword Gusmão kleur kleur tiha ona.
Nia hahú iha tama Timor iha 1997 maibé nia hatene Timor-Leste nia istória ne’e iha 1992 kona-ba maksakre 12 novembru no demostrasaun iha Jakarta-Indonézia, halo sira-nia sentimentu fó apoiu solidariedade makaas ba Timor-Leste nia luta ba independensia.
Timor-Leste lakon tanba Ministériu Negosiu Estranjeiru no Koperasaun (MNEK) hare ninia kontribuisaun la’ós ba rezistensia de’it hodi manan funu, maibé nia servisu iha Ministériu Negósiu Estranjeiru hanesan asesór hodi fó apoiu iha área linguistika liliu iha área inglês.
“Ne’ebé, ami lakon boot husi MNEC, ema di’ak ida-ne’ebé fó apoiu ba ita-nia ministériu. Ninia kontribuisaun ne’e la’ós ba luta rezisténsia de’it maibé ita ukun aan tiha, nia mai fó kapasitasaun iha Ministériu Negósiu Estranjeiru ne’e boot tebe-tebes. Nia hanesan asesór iha área protokolu iha lian inglês no kapasitasaun,” Sekretariu Jerál hato’o ba Agência TATOLI, liuhusi telefónika, tersa ne’e.
Sekretariu Jerál reforsa, iha Ministériu tomak ne’e, kuandu hakarak halo surat ruma karik fó ba nia haree uluk, molok avansa ba oin, nune’e ninia kontribuisaun boot tebe-tebes, nune’e Ministériu Negósiu Estranjeiru no Kooperasaun lakon ema di’ak ida.
Nune’e mós, Prezidente Repúblika Timor -Leste, José Ramos Horta hato’o nia sentidu lakon ho prezensa Tom nian iha Timor-Leste, iha nia pajina ofisiál Facebook, hakerek “Adeus Tom, Ami sei hanoin ó ba nafatin. Bele hamutuk ho Max Stahl ne’ebé husik sedu liu. Imi na’in-rua iha ami- nia memória no istoria ami nian.”
Jornalista : Jesuína Xavier
Editór : Cancio Ximenes
