Natál lori domin, dame no fraternidade
VIQUEQUE, 25 dezembru 2024 (TATOLI)- Padre, Manuel Pinto, husu, sarani katóliku postu administrativu Uatulari presiza halo re-identifika ba ida-idak nian moris tomak iha selebrasaun Natál ne’e tanba Kosok-oan Jesus lori domin, dame no fraternidade ba sarani hotu iha Timor-Leste.
“Tinan tinan ita sarani katólika iha mundu tomak halo selebrasaun ba loron Natál nian. Nune’e Natál ne’e ita presiza halo maka re-identifikaba ita-nia an no ba imi-nia moris loron nian. Husi na’in Jesus nia-moris mak roman husi na’in Maromak hodi loke ita-nia konsiensia fé (fiar) ba Maromak no loke konsiensia justisa ba ema seluk”, Pe, Manuel Pinto, SDV, hateten iha selebrasaun Natál iha parokia Nosa Senora de Fatima, postu Uatulari, ohin.
Amu selebrante ne’e afirma, naroman sai matadalan ba sarani sira hodi fiar de’it ba na’in Jesus Kristu, hodi simu kna’ar, fiar, dame, amizade no simu faternidade iha sosiadade nian le’et.
Nia dehan, Jesus nian presensa lori espirítu amizade, espirítu halibur ema, espirítu rekoñesimentu ba ema seluk nian presenja, espirítu perdaun nune’e sarani sira banati tuir.
Tuir observasaun Jornalista Agência Tatoli, iha selebrasaun loron Natál iha Igreja Nosa Senora de Fatima Uatulari nota katak misa selebrasaun sarani sira ho antusizmu partisipa misa iha ambiente hakmatek no laiha barullu to’o misa ramata.
Enkuantu, situasaun jerál iha postu admiministrativu Uatulari la’o ho normál durante iha misa selebrasaun Natál ida-ne’e tanba hetan seguransa husi Polísia Nasionál Timor Leste (PNTL) eskuadra Uatulari.
Jornalista : Vitorino Lopes da Costa
Editór : Florencio Miranda Ximenes
