DILI, 26 dezembru 2024 (TATOLI) – Komandu Falintil-Forsa Defeza Timor-Leste (F-FDTL) hamutuk ho dirijente no kargu xefia husi Ministériu Defeza presta presta omenajen ikus ba matebian membru F-FDTL ho deviza Alferes Armelindo da Cruz “Rede” ne’ebé fila hikas ba aman Maromak Nia kadunan Santo tanba sofre moras komplikadu.
Matebian nudar kuadru permante militár F-FDTL ne’ebé ativu hela iha instituisaun, hahú iha tinan 2001 no hakotu iis iha 2024.
Xefe Estadu Maiór F-FDTL Brigadeiro Jenerál José da Costa Soares “Trix” hateten, Saudozu Alferes Armelindo da Cruz lakon vida iha Ospitál Nasionál Guidu Valadares iha 23 Dezembru, tanba sofre moras komplikadu.
“Saudozu, ema ne’ebé komandu F-FDTL hili responsavel ba komunikasaun ho materiál funu Guerra nian. Ita la’ós hili ema arbiru, entaun mai ami sente lakon tan ami-nia ema di’ak ida ne’ebé dedika aan tomak ba Estadu hodi servi ho domin, maibé destinu mak ida-ne’e, ita labele salva to’o iha ospitál mak lakon vida”, José Trix hateten ba jornalista sira hafoin presta omenajen ikus ba Saudozu Armelindo iha Kuartel Jenerál F-FDTL Fatuhada, kinta, ohin.
Trix dehan, maske Saudozu Armelindo fila hikas ona ba mundu seluk, maibé lei interna Instituisaun F-FDTL kontinua tau matan ba oan kiak sira tuir diretu ne’ebé Governu estabelese ona.
Saudozu mate ho idade 55 hanesan ofisiál Instituisaun F-FDTL, hahú kedas iha rekrumentu iha Aileu to’o ohin loron, nune’e saudozu mós nudar ema ne’ebé kontribu ba dezenvolvimentu Instituisaun F-FDTL nian.
Saudozu servisu iha Instituisaun F-FDTL koloka ona iha fatin barak hanesan iha Sentru Instrusaun Komandante Nicolau Lobato Metinaru, responsavel ba jestaun komunikasaun ho jestaun ba fatin rai materiál funu Guerra nian iha Instituisaun F-FDTL.
Biografia badak husi matebian Alferes Amelindo da Cruz “Rede” mak tuir mai ne’e:
Saudozu Alferes Armelindo da Cruz “Rede” moris iha Soibada iha lori 25 Fevereiru 1969, tinan 55, fila hikas ba maromak nia kadunan Santu iha 23 Dezembru 2024.
Saudozu Armelindo da Cruz Oan husi Aman Mateus da Cruz (Falecido) ho Inan Claudina da Costa (Falecida) Saudosu husik hela nia Kaben Edia Fernandes no Oan nain 6 (Neen) mak ho naran tuir mai ne’e Expedito da Cruz, Esmaiel Fernandes Sarmento da Cruz, Delicia Fernandes da Cruz, Geronimo Fernandes da Cruz Manuel Vicente Fernandes da Cruz no Claudina Fernandes da Cruz.
Saudozu hahú nia Estudu iha tinan 1980 to’o 1986 Ensinu Primaria No 10 Malon Bairo Pite Dili, iha tinan 1987 ate 1990 Ensinu Pre Sekundáriu No 4 Fatumeta Dili, iha Tinan 1991 ate 1994 Ensinu Sekundáriu No 2 Matadoru Dili.
Tanba ne’e iha loron transformasaun Forsa Armada Libertasaun Nasionál Timor-Leste FALINTIL iha loron 02 Fevereiru 2021 ba FALINTIL-Forsa Defeza Timor-Leste F-FDTL, Saudozu Armelindo da Cruz, koloka iha Primeiru Batallaun iha Kompaña C nu’udar Soldadu.
Iha loron 23 Jullu 2003, Saudozu koloka mai fali iha FCU Metinaro. Iha loron 13 de Dezembru, 2003, hetan Promosaun ba Furriel. Iha 17 Dezembru 2005 Saudozu koloka fali iha Kuartel Jenerál iha Divisaun Komunikasaun / J6.
Iha loron 23 Jullu 2007 promove ba Segundu Sargentu, depois Iha 11 Dezembru 2016 promove ba Primeiru Sargentu, iha 13 Abril 2023 Saudozu koloka fali ba Unidade Apoiu Kuartél Jenerál iha Seksaun Aramajen.
Iha 13 abríl 2024, Saudozu hetan promosaun hodi promove ba Alferes nu’udar Xefe Seksaun Armajen to’o Soudozu sofre moras, Saudozu fó nia dedikasaun tomak ba Instituisaun F-FDTL durante tinan rua nolu resin tolu, atu tama ba tinan rua nolu-resin hat.
Durante tinan rua nulu resin nia laran ne’e, Saudozu hala’o buat barak hanesan servisu Militár no mós partisipa iha treinamentu no kursu, sira ne’ebé instituisaun haruka, mak hanesan tuir mai ne’e.
lha 13 Dezembru 2002, tuir Kursu Komunikasaun bázika iha Metinaru, depois kontinua kursu iha 24 Outubru 2003 iha Komunikasaun avansadu Tier III iha Metinaru.
Iha loron 12 Dezembru 2003, tuir Kursu Leadership iha Metinaro, iha 12 Dezembru 2003 tuir Kursu Supply Basic iha Metinaru, Iha 31 Marsu 2004 tuir Kursu Supply Basic iha Metinaro. Iha 17 Dezembru 2010 tuir Kursu Informátika iha SENAI Becora Dili. Iha 20 Abril 2012 tuir Kursu Komunikasun Planeamentu iha DCP Dili. lha 07 Novembru 2012 tuir Primeiro kursu Formasaun Lian Portugues (Nivel Al) iha Dili. lha 25 Fevereiru 2013 tuir Primeiru kursu Formasaun Lingua Portugés (Nivel A2) iha Dili. Iha 06 Juñu 2013 tuir Human Resource Policy Capacity Building Career Development & Palaning iha Jakarta Indonesia.
Jornalista: Natalino Costa
Editór: Zezito Silva
