MAE entrega motorizada 72 ba suku 36 iha Viqueque
VIQUEQUE, 26 dezembru 2024 (TATOLI)-Reprezentante Ministru Administrasaun Estatál (MAE), atuál Diretór Jerál Desentralizasaun Poder Lokál, António Guterres, husu xefe suku 36 iha munisípiu Viqueque uza veikulu motorizada ne’ebé Governu oferese ho responsabilidade hodi servi populasaun sira iha baze.
“Ohin, Governu halo serimónia distribuisaun motorizada ikus ba xefe suku 36. Tanba ne’e, ha’u husu ba autoridade suku sira tenke uza veíkulu motorizada sira-ne’e ho responsabilidade hodi responde ba ita-nia povu nian nesesidade”, hatete Diretór Jerál ne’e iha serimónia distribuisaun motorizada ba xefe suku sira, iha resintu munisípiu Viqueque, ohin.
Diretór Jerál ne’e profunda, reprezeta Estadu no Governu iha baze maka xefe suku sira tanba sira maka besik liu iha povu hodi responde ba objetivu estratejia dezentralizassaun munisipál nian hodi lori Governu hakbesik liu ba povu ne’ebé liuhusi postu administrativu no suku sira.
Tanba ne’e, nia dehan MAE sosa motorizada sira-ne’e ba xefe suku sira hodi hakbesik-an ba povu hodi presta servisu liuliu halo atendementu ba povu.
“Motorizada referida ho xapa matríkula marka GA ne’e signifika labele fó impresta ba ema sira iha suku hodi la’o ba violasaun tranzitu nian. Se nune’e tenke toma responsablidade perante lei tranzitu nian”, eis PAM Baucau sujere.
Utiliza hodi servi povu
Iha fatin hanesan, Prezidente Autoridade Munisípiu (PAM) Viqueque, Francisco Cruz Simões de Gonzaga Soares, haktuir, durante ne’e autoridade suku sira iha munisípiu Viqueque emfrenta ba transporte, maibé Governu fó ona resposta ba preokupasaun sira-ne’ebé autoridade sira relata liga ba transporte.
“Nune’e ba transporte ne’ebé Governu fó ba autoridade suku sira tenke hatene utuliza hodi servi ba ita-nia povu nian nesesidade. Ha’u espera katak ho transporte sira-ne’e bele hatutan ona autoridade sira nian servisu iha baze”, PAM Viqueque subliña.
Xefe Suku agradese
Iha biban ne’e, Xefe suku Ahic postu Lacluta, Ercilio Soares, husu agradese ba Governu ne’ebé oferese motorizada ba autoridade suku sira hodi responde ba nesesidade komunidade sira nian.
“Ami agradese ba Governu ne’ebé oferese ona motorizada sira-ne’e ba ami. Ami promete sei utiliza de’it ba atendementu povu nian ho responsablidade no sei uza ba nesesidade povu nian hodi hakbesik ba ita-nia povu iha baze”, nia kompromete.
Serimónia distribuisaun motorizada sira-ne’e ofisialmente entrega iha resintu munisípiu Viqueque ne’ebé entrega direta husi reprezentante MAE atuál Diretór Jerál no PAM Viqueque.
Enkuantu, motorizada referida kada suku ida hetan rua marka Verza utiliza husi xefe suku no motorizada marka revo fit utiliza husi ofisial suku sira.
Tuir dadús motorizada ne’ebé Governu liuhusi MAE aloka ba munisípiu Viqueque hamutuk unidade 72, husi númeru ne’e kada suku ida hetan motorizada rua kompostu husi motor ho tipu verza ida no motor revo fit ida.
Iha serimónia distribuisaun motorizada ne’e hetan partisipa husi diretór servisu munisípiu, xefe departamentu, xefe suku 36 no funsionáriu suku 36 sira.
Jornalista : Vitorino Lopes da Costa
Editór : Florencio Miranda Ximenes
