DILI, 26 dezembru 2024 (TATOLI)- Prezidente Repúblika Xina, Xi Jinping, hakarak aprofunda kooperasaun mutuamente benefísiu entre Timor Leste ho Xina iha futuru.
Prezidente Xina hato’o lia hirak ne’e bainhira, haruka karta aniversáriu ba Prezidente Repúblika, José Ramos-Horta hodi dehan, “feliz aniversáriu ba Prezidente Repúblika, José Ramos-Horta, ne’ebé selebra aniversáriu ba dala 75”.
“Sr. Prezidente nu’udar belun kle’ur ona povu Xina nian ne’ebé fó ona kontribuisaun boot hodi dezenvolve relasaun entre Xina no Timor-Leste. Iha fulan Jullu, Sua Majestade halo vizita susesu ida ba Xina. Ami hala’o enkontru amizade ida iha Pekin no hetan konsensu ida kona-ba diresaun ba objetivu komún hodi harii komunidade Xina-Timor-Leste ho futuru ne’ebé kompartilla”, tenik iha nota ne’ebé Agência TATOLI asesu hosi media Gabinete Palásiu Prezidensiál Dili, ohin.
Prezidente tenik tan katak, sempre fó importánsia boot atu dezenvolve relasaun entre Xina no Timor-Leste.
“Ha’u iha vontade atu servisu hamutuk ho Prezidente atu kontinua ita-nia amizade tradisionál, hakle’an kooperasaun ne’ebé fó benefísiu ba malu, no lidera relasaun bilaterál sira hodi avansa ba objetivu ne’ebé ita estabelese hamutuk hodi hadomi liután ita-nia povu rua,” nia katak
Xefe Estadu Xina hein katak Xefe Estadu Timor Leste sei saudavel nafatin no hetan buat ne’ebé di’ak liu durante viajen moris iha mundu ne’e.
Jornalista: Hortencio Sanchez
Editór: Florencio Miranda Ximenes
