COVALIMA, 26 dezembru 2024 (TATOLI) – Hahú janeiru to’o dezembru ne’e, Autoridade Protesaun Sívil (APC-sigla portugés) rejista uma-kain 117 mak sai vítima ba dezastre naturál iha munisípiu Covalima.
Komandante Operasaun APC Munisípiu Covalima, Celestino Afonso Ferreira informa, APC rejista vítima dezastre naturál mai husi postu administrativu Fatululik, Fatumea, Fohorem, Tilomar, Maucatar, Suai no Zumalai.
“Hahú janeiru to’o 26 dezembru ne’e Autoridade Protesaun Sívil rejista vítima dezastre naturál hamutuk 117 ne’ebé mai husi postu administrativu hitu ne’ebé mak pertense ba munisípiu Covalima”, Komandante Operasaun APC Munisípiu Covalima, Celestino Afonso Ferreira relata dadus ne’e iha Santa Rosa, ohin.
APC rejista vítima dezastre naturál hamutuk uma-kain 117 ne’e ho tipu dezastre sira hanesan, anin sobu uma 92, ahi han uma 17, inundasaun haat no rai-halai haat no hetan hotu ona apoiu emerjénsia.
Hafoin fó apoiu emerjénsia ai-han ho la’os ai-han ekipa tékniku sira kontinua hala’o verifikasaun ba vítima sira-nia kondisaun uma nune’e kontinua bele fó apoiu materiál rekoperasaun.
Durante ne’e APC Covalima halo verfikasaun dadus uma-sira ne’ebé hetan estragu hosi dezastre naturál ho tipu sira mak hanesan aat kmaan 48, aat naton 14 no aat totál uma-kain 55 ne’ebé seidauk fó apoiu rekoperasaun ba vitima sira.
“Ita ko’alia kona-ba apoiu emerjénsia, vítima sira hetan ona apoiu sira hanesan ai-han ho la’ós ai-han maibé atu fó materiál rekoperasaun prosesu hala’o iha nasionál nune’e ita hein desizaun husi nasionál bainhira mak atu fo apoiu,” nia dehan.
APC mós alerta ba komunidade sira tempu udan labele hakat mota, sira ne’ebé besik uma nune’e labele lori dezastre ba komunidade sira tanba daudaun ne’e tempu udan bele hamosu dezastre ho tipu oi-oin.
Jornalista: Celestina Teles
Editór: Rafael Ximenes de A. Belo
