DILI, 27 dezembru 2024 (TATOLI)-Durante natál, kosok-oan ka bebé hamutuk na’in-33 mak moris iha Hospital Nasionál Guido Valadares (HNGV), ho seguru.
“Iha loron 24 to’o 25 bebé ne’ebé moris iha Sala materindade HNGV hamutuk 33 ho kondisaun normál hotu,” Xefe Departamentu Obstetrísia no Ginekolojia iha HNGV, Zinia Mascarenhas informa ba jornalista sira iha sala maternidade HNGV, ohin.
Xefe Zinia Mascarenhas relata, husi númeru 33 ne’e iha mós partu normál hamutuk 17, sejariana hamutuk 14 no partus vakum na’in rua no kaduak na’in rua.
Bebé na’in-33 ne’e, feto iha na’in-16 no mane hamutuk 17.
“Bebé hirak ne’e mate laiha no mós inan sira mós mate laiha. Bebé ho nia inan sira ne’e kondisaun di’ak hotu. Ita haree Sejariana ho partus normál nia númeru atu hanesan tanba ita haree bebé nia fuan la normál entaun ami iha indikasaun tenke opera atu lalais salva bebé no nian inan nia vida lalais,” nia esplika.
Pesoál saúde ne’e informa katak banhira inan isin rua halo sejariana tenke halo internamentu durante loron tolu depois kondisaun bebé ho inan normál ona mak hafoin alta.
Jornalista : Felicidade Ximenes
Editór: Rafael Ximenes de A. Belo
