VIQUEQUE, 27 dezembru 2024 (TATOLI)- Xefe Suku Ahic, postu administrativu Lacluta munisípiu Viqueque, Ercilio Soares, informa, komunidade suku Ahic no suku Laline husi postu Lacluta ahi eletrisidade avaria kuaze fulan ida-resin, nune’e komunidade sira la asesu ba eletrisidade.
“Ami-nia eletrisidade kuaze fulan ida-resin la lakan hahú husi Laline, área Ai-Tana to’o iha ha’u-nia suku Ahic. Tanba seidauk halo manutesaun eletrisidade husi munisípiu Manatuto”, Ercilio Soares ba Tatoli, iha postu Lacluta, ohin.
Ho kestaun ne’e, komunidade iha suku referida konsege halo selebrasaun Natál iha nakukun laran.
“Kona-ba ahi eletrisidade ne’ebé mate durante ne’e ha’u rasik kontaktu direta ba Eletrisidade de Timor Leste, Empreza Públika (EDTL,E.P) husi nasionál, maibé EDTL,E.P sira dehan ba ha’u eletrisidade liga iha ami-nia suku, sei responsavél husi empreza Waitau Unip Lda. Nune’e sira fó resposta ida ba ami katak iha tempu badak nian laran empreza sei halo manutensaun. Maibé ami hein to’o mai agora empreza mós seidauk ba halo manutensaun”, nia afirma.
Tan ne’e, nia husu ba EDTL,E.P no empreza responsavél aselera manutensaun ba ahi eletrisidade ne’ebé avaria kuaze fulan ida-resin ne’e, atu tama ba simu tinan foun komunidade asesu sira bele fila eletrisidade.
Hatán ba preokupasaun ne’e, Koordenadór EDTL,E.P munisípiu Viqueque, Ernesto Sarmento, rekoñese eletrisidade suku rua iha postu Lacluta, daudaun ne’e avaria hela tanba kauza husi liña eletrisidade, nune’e ekipa EDTL,E.P halo observasaun.
“Maibé, ahi eletrisidade ba suku rua ne’e sei responsavél husi empreza sira tanba sei iha retensaun. Nune’e ami halo koordenasaun ho parte empreza sira, maibé daudaun ne’e kondisaun dalan maka ladun di’ak. Tan ne’e, mak empreza sira seidauk ba hadi’a liña eeltrisidade ne’ebé avaria. Nune’e ami nafatin tenta empreza sira atu hadi’a lalais komunidade sira bele asesu fila fali eletrisidade”, nia hato’o.
Projetu eletrifikasaun implementa iha suku rua ne’e implementa iha tinan 2022 no 2023 ne’ebé hetan inaugurasaun ona husi EDTL,E.P, Projetu Eletrifikasaun Nasionál (PEN) referida responsavé husi empreza Uaitau Unip.Lda no empreza Carnesia Unip.Lda.
Tuir dadús uma-kain husi suku Laline hamutuk 155 no suku Ahic uma-kain 450 maka la asesu ba eletrisidade.
Jornalista : Vitorino Lopes da Costa
Editór : Florencio Miranda Ximenes
