KSDS hala’o avaliasaun situasaun seguransa tinan 2024
DILI, 27 dezembru 2024 (TATOLI) – Reuniaun Konsellu Superior Defeza no Seguransa (KSDS), sesta ne’e, iha Palásiu Prezidensiál Dili, dirije husi Prezidente Repúblika, José Ramos-Horta, hala’o avaliasaun situasaun seguransa nasaun nian durante tinan 2024.
“Enkontru ida ne’e kona-ba balansu seguransa tinan 2024, enkontru ne’e atu avalia situasaun seguransa nasaun nian, ita hotu hatene katak iha tinan ida-ne’e iha fulan-Setembru ita simu vizita boot ida mai Timor-Leste mak Sua Santidade Papa Francisco la’o di’ak tebes,” Portavoz ba reuniaun ne’e João Aparicio hateten ba jornalista sira hafoin remata reuniaun.
Nia dehan, ámbitu reuniaun ne’e hatudu sinál konfiansa, seriedade, trankuilidade no signifika aspeitu boot tebes entre timoroan fiar-na’in sira simu vizita Sua Santidade Papa Francisco.
“Pontu ida tan mak ko’alia kona-ba oinsa kontinua hametin kooperasaun entre entidade seguransa rai-laran no departementu Estadu hotu atu prevene konflitu iha ita nia nasaun,” nia dehan.
Enkontru ne’e atu haree hamutuk medida seguransa saida mak sei implementa durante selebrasaun tinan foun.
Jornalista: Hortencio Sanchez
Editor: Florencio Miranda Ximenes
