Komandu PNTL enkoraja joven Bebonuk kontribui pás iha ámbitu tinan foun
DILI, 29 dezembru 2024 (TATOLI)- Komandante Eskuadra Dom Aleixo, Inspetór Asistente Polísia Domingos Pinto, husu ba joven sira iha suku Bebonuk atu kria pás no estabilidade iha suku Bebonuk nune’e selebrasaun tinan foun bele la’o di’ak.
“Ha’u husu inan-aman liu-liu ba joven sira iha suku Bebonuk atu kria pás no estabilidade atu nune’e ema hotu bele moris iha dame ksolok no felis nia laran. Ha’u husu mós ba joven sira atu fó domin ba inan aman,” Domingos Pinto iha nia intervensaun bainhira partisipa diálogu komunitáriu ne’ebé organiza husi autoridade lokál suku Bebonuk, sábadu horseik.
Autoridade polisiál ne’e dehan, iha tempu loron boot, joven sira labele buka problema maibé oinsá atu kria pás no estabilidade hodi fó domin ba inan no aman atu kontente hodi hala’o idak-idak nia moris.
“Hau husu ba joven sira, ita-nia inan no aman sira-nia tempu liu ona, maibé idade hanesan imi seidauk to’o atu fo buat boot ba sira, laiha oan ida selu inan-aman nia kole, maibé naton ba ita mak ne’e halo sira kontente, ida-ne’e mak importante,” nia adianta.
Komandante Eskuadra Dom Aleixo, Inspetór Asistente Polísia Domingos Pinto fó hanoin ba joven sira atu lalika rai odiu ba malu no rai odiu ba PNTL tanba PNTL sempre servisu ho neutralidade.
“Joven sira-nia kontribuisaun ba rai ida-ne’e importante, hau lakohi hau-nia joven sira iha ameasa no intimisaun nia laran, maibé kuidadu imi-nia aan no kuidadu imi-nia saúde tanba nasaun presiza imi atu servi nia”.
“Bainhira joven sira halo problema beibeik mak sei hasoru buat tolu; imi sei para iha ospitál, bainhira naton liu ba iha prizaun Becora no bainhira ladiak liu mak imi tenke ba suku la fila-fali,” nia afirma.
Iha fatin hanesan, Xefe Suku Bebonuk, Alfredo da Costa, hateten, suku Bebonuk organiza diálogu komunitáriu ida-ne’ebé partisipa hosi komunidade sira liuliu joven sira iha suku Bebonuk rasik, autoridade seguransa PNTL eskuadra Dom Aleixo atu buka solusaun ba problema, tanba suku Bebonuk mai ho nia karakter ida-ne’ebé to’os tebes tanba ne’e mak liuhusi diálogu sira hanesan ne’e bele enkoraja joven sira hodi hakribi violénsia.
“Ha’u fiar katak ho diálogu ida-ne’e joven sei hamutuk buka solusaun atu kria pás no estabilidade iha suku Bebonuk ida-ne’e tanba suku Bebonuk mai ho karakter ida ne’ebé ho keras no la fasil ita atu muda ema nia pensamentu, maibé liuhusi atividade ida-ne’e ami la’o neneik sei hadi’a ba oin ho di’ak liután,” nia dehan.
Laper komunitáriu ne’e garante katak ba oin sei la mosu tan problema tanba kuandu joven sira halibur malu no halo problema nia rasik mak sei entrega ba autoridade seguransa atu garante estabilidade no pás iha suku Bebonuk.
Reprezentante Arte Marsiál, Persaudaraan Setia Hati Terate (PSHT) Suku Bebonuk Manuel Coelho, hateten, joven sira husu Grupo Artemarsiais PSHT iha suku Bebonuk sei garantia pás no estabilidade.
“Bainhira se mak halo problema mak ha’u rasik sei akompaña ho autoridade seguransa hodi halo kapturasaun. Ha’u-nia hakarak suku Bebonuk ne’e hakmatek no ha’u husu ba Joven sira atu kria pás no estabilidade; haluha pasadu, hanoin ba future,” nia garante.
Antigu xefe joventude Suku Bebonuk Cristiano de Araújo Carvalho, hateten, hanesan joven orgullu tanba autoridade seguransa PNTL eskuadra Dom Alexo bele halo diálogu ho komunidade liu-liu joven iha suku Bebonuk atu garante pás no estabilidade.
“Hanesan joven nafatin kolabora ho autoridade lokál no mós autoridade seguransa PNTL atu garantia seguransa iha Bebonuk. Ha’u nu’udar joven ida iha suku Bebonuk ha’u iha morál atu kontrola ha’u-nia joven sira hodi kria pás no estabilidade atu nune’e suku Bebonuk bele hakmatek atu ita-nia inan-aman bele la’o livre hodi hala’o idak-idak nia aktividade,” nia konklui.
Jornalista: Natalino Costa
Editór: Rafael Ximenes de A. Belo
