COVALIMA , 28 dezembru 2024 (TATOLI) – Reprezentante husi Ministériu Administrasaun Estatál (MAE) Amandio Paulino de Sousa ho ekipa no deputadu husi Bankada CNRT, Natalino dos Santos , akompaña husi Prezidente Autoridade Covalima, inaugura, rezidénsia Prezidente Autoridade munisipál (PAM) Covalima.
“ Ohin ita inaugura rezidénsia Prezidente Autoridade munisipál Covalima ne’ebé implementa liuhusi projetu Planu Dezenvovimentu Integradu Munisipál ( PDIM) iha Covalima”, Amandio Paulino de Sousa, hato’o liuhusi nia diskursu, iha rezidénsia PAM, Santa Rosa, ohin.
Nia dehan, Implementasaun projetu PDIM sai hanesan indikadór ida hodi halo avaliasaun kondisaun mínimu oinsá atu implementa lei podér lokál no desentralizasaun administrativa iha Covalima. Tan ne’e, Autoridade Covalima hamutuk ho estrutura no seguransa atu kontrola ho di’ak halo implementasaun programa sira.
Iha serimónia inaugurasaun rezidénsia PAM Covalima ne’e, nia mós hato’o mensazen husi Ministru MAE, ne’ebé hodi alerta ba autoridade Covalima to’o xefe aldeia sira atu selebra loron boot tinan foun ho hakmatek, presiza kria pás no estabilidade.
Prezidente Autoridade Munisípiu Covalima , Miguel Armanda Cardoso, reforsa katak, Autoridade Covalima hala’o serimónia inaugurasaun rezidénsia PAM ne’ebé konstrui uza orsamentu jerál Estadu 2021.
“ Ita inaugura rezidénsia PAM Covalima ne’ebé hahú kontrui iha 2022 ne’ebé konstrusaun finaliza iha 2023 tuir loloos hala’o kedas inaugurasaun maibé tanba halo mudansa buat balun foin mak halo inaugurasaun,” nia dehan.
Fó hanoin fali katak, Konstrusaun Rezidénsia PAM Covalima ho nia medida 30,70× 22,50 ne’e konstrui husi empreza Verde Kaisahe Unipesoal Lda bazeia ba kontratu ho durasaun tempu durante fulan neen (6) ho totál orsamentu hamutuk $ 262.570.
Rezidénsia PAM Covalima konstrui liuhosi projetu PDIM ne’ebé empreza Verde Kaisahe Unipesoal Lda hahú kontrui iha 2022 finaliza iha 2023 no hala’o inaugurasaun iha loron 28 Dezembru 2024 ne’e.
Jornalista: Celestina Teles
Editór: Rafael Ximenes de A. Belo
