Autoridade Covalima enkoraja ba komunidade kontribui pás iha ámbitu selebrasaun tinan foun
COVALIMA , 30 dezembru 2024 (TATOLI) – Prezidente Autoridade Munisípiu (PAM), Covalima, Miguel Armada Cardoso husu ba komunidade sira atu kria pás no estabilidade nune’e selebra tinan foun ho di’ak.
“ Ha’u husu ba komunidade sira atu kria pás no estabilidade hodi selebra loron boot tinan foun tanba foin lalais ita selebra loron boot natál ho hakmatek, tanba ne’e komunidade sira presiza mantein selebra tinan foun ho hamatek” Miguel Armada Cardoso hato’o mensajen ne’e ,iha Santa Rosa.
Autoridade Covalima ne’e dehan, komunidade sira bele selebra tinan foun ho kontente, maibé importante labele hamosu problema no presiza kria pás no estabilidade iha ida-idak nia moris hodi simu tinan foun.
“Ita hotu presiza hakmatek hodi selebra loron boot natál no tinan foun tanba la iha problema ruma tanba ne’e nafatin atu garante pás no estabilidade durante selebra tinan foun,” nia fo hanoin.
Iha sorin seluk, abitante João Leita reforsa, ema hotu selebra tinan foun ho kontente maibé importante labele kria problema, presiza kria pás no estabilidade hodi hakribi violénsia.
“Ita hatene katak ema hotu hahú viajen husu Dili mai ona munisípiu no husi munisípiu viajen ona ba postu administrativu sira atu simu loron boot tinan foun iha ida-idak nia bairru ho kontente”nia dehan.
Jornalista: Celestina Teles
Editór: Rafael Ximenes de A. Belo
