VIQUEQUE, 31 dezembru 2024 (TATOLI)-Família no sarani parókia postu Uatulari, munisípiu Viqueque selebra misa tinan-25 moris konsagrada fiar husi madre Maria Servasia, kongegrasaun Putri Reina Rosari (PRR, sigla portugés).
Iha misa agradesementu ne’e Pe, Heri Soares Pedro, Sosietas Vervi Divino (SVD, sigla portugés), hateten, loron ohin sai haksolok úniku ba selebrasaun madre Maria Servasia nian ba tinan-25 nu’udar moris sagradu nian.
“Husi selebrasaun fiar na’in ida-ne’e tanba ita fiar ne’ebé ita rasik mak kuda ba ita-nia aan hodi hatán ba Na’in nian bolu. Ita sira-ne’ebé Maromak bolu la’ós tanba ita ema ne’ebé popularidade, maibé Maromak hatene no koñese nanis ona. Husi esperiénsia ne’ebé Madre Maria Servasia nian ne’ebé hala’o misaun husi fatin ida ba fatin seluk tanba madre fiar katak la la’o mesak, maibé la’o no hakat hamutuk ho Maromak”, amu haklaken.
Pe. Heri aprofunda, madre Maria Servasia la’o la fasil husi Uatulari ba Indonézia hodi tuir formasaun to’os ikus ba duni na’in nian bolu.
“Ita la sente kolen ita hamutuk hodi partilla fila fali ksolok selebrasaun ida-ne’e Maromak rasik tula tomak ba Madre Maria Servisia durante tinan-25. Ha’u sei hamutuk ho ó nia aan hakat sira, hatudu prezensa Maromak nian, iha aspetu hotu-hotu ne’ebé mak ita presiza, ita komprende iha ita-nia moris Maromak la’o ho ita tanba Maromak sai matadalan tanba Maromak sai hanesan Matadalan ba moris no Maromak sai matadalan ba Misaun”, saserdote ne’e haklaken.
Tanba ne’e, nia dehan, “prezensa Maromak nian hodi hatudu dalan loloos no justisa boot tebes iha ita-nia moris tomak. Husi ne’e Maromak nunka mais abandona ita, maske ita moris iha situasaun difísil laran, bainhira ita sente ita la kbiit, ita sente mesak hakarak atu haree Maromak hanesan iha momentu ida-ne’ebé ita sente moras, triste no terus, maibé Maromak sempre la’o ho ita”, nia haktuir.
Iha fatin hanesan madre, Maria Severisia, PRR, agradese ba Maronak tanba Na’in haraik ona fiar no durante akompaña prosesu sira ba dalan fiar nian.
“Ha’u agradese ba Na’in vokasaun ne’ebé Na’in haraik ona mai ha’u, ita boot akompaña ha’u-nia esforsu sira, liuliu ba ha’u-nia dalan vokasaun nian ne’ebé to’o tinan-25 ha’u saran-an ba Maromak. Ha’u agradese Na’in tanba saran ha’u sai masin Maromak nian iha mundu, Ita-boot haforsa ha’u iha situasaun difísil no susar, maibé Ita-boot nian grasa liuhusi inan Maria Virjen hodi too mai moris ida-ne’e”, na’in Me, Maria realsa.
Iha biban ne’e reprezenta família husi uma-kain Titimori, postu Uatulari, Manel Freitas, agradese padre selebrante sira-ne’ebé selebra ona misa agradesementu ba Madre Maria Servasi iha igreja Uatulari.
“Ami família husu agradese padre, madre no sarani sira-ne’ebé partisipa iha misa agradesementu Madre Maria Servasi ba tinan-25, hala’o misaun servi ba uma-kreda no sarani sira. Tan ne’e ami família agrasese ba parte hotu nian apoiu ba realiza misa ida-ne’e ne’ebé bele la’o ho di’ak,” nia hato’o.
Iha selebrasaun misa agradesementu ne’e hetan partisipasaun másimu hosi padre, madre, autoidade lokál, seguransa, família Titimori no sarani sira parokia Uatulari.
Jornalista : Vitorino Lopes da Costa
Editór : Rafael Ximenes de A. Belo
