DILI, 03 janeiru 2025 (TATOLI) – Komandante Polísia Nasionál Timor-Leste (PNTL) Munisípiu Dili Superintendente Xefe Polísia Orlando Gomes, subliña PNTL rejista kazu sia no detein suspeitu na’in-ne’en durante selebrasaun tinan foun 2025.
¨Iha selebrasaun tinan foun, hahú kedan husi 31 mai to’o dia 1, Komandu Munisípiu Dili rejista kazu sia no kazu sia ne’e ita detein suspeitu na’in-ne’en no ita halo ona prosesu hodi aprezenta ba Ministériu Públiku¨, Superintendente Xefe Polísia Orlando Gomes, hateten ba jornalista sira iha nia knaar fatin Eskuadra Dom Aleixo, sesta ne’e.
Nia esplika, kazu sia kompostu husi kazu asaltu malu entre joven ho joven ne’ebé mosu iha fatin rua, kazu ofensa integridade simples rua, kazu ofensa integridade fízika grave rua, iha kazu arma branka rua no kazu ema mout ida iha Dolok-Oan Cristo Rei.
¨Kazu sira ne’e mosu tanba ita-nia joven sira lanu, hahú husi dia 31 kalan to’o mai iha dia 1. Kazu sira ne’e hothotu ita rejista ona no halo ona identifikasaun ba suspeitu sira no ita aprezenta ona ba Ministériu Públiku hodi halo prosesu¨, nia adianta.
Komandante Orlando hateten, kazu joven ida mout iha tasi Dolok-Oan nia iha koñesimentu.
¨Ha’u iha koñesimentu kona-ba ita-nia joven ida mout iha tasi Dolok-Oan, tuir informasaun ne’e katak joven ne’e ho kalsa naruk ba hariis tasi depois mak mout. Nune’e mak ita-nia forsa armada halo patollamentu iha fatin ne’eba mak hetan, hafoin sira ho ro kiik mak ba hasai ita-nia joven ne’e iha tasi klaran mai rai maran, hafoin lori ba HNGV hodi entrega ba família sira¨, nia informa.
PNTL rejista kazu asidente tráfegu lima
Superintendente Xefe Polísia Orlando, akresenta katak durante selebrasaun tinan foun, PNTL Dili rejista kazu asidente tráfegu lima, entre asidente tráfegu lima ne’e rezulta ema na’in-ida mak mate, enkuantu haat seluk ne’e rezulta ema kanek kaman.
¨Ita iha dia 31 no dia 1, ita mós rejista kazu asidente tráfegu lima entre motor ho motor. No motor ho karreta. Entre kazu sira ne’e iha ida mak asidente fatal ne’ebé rezulta ema mate. Kazu ida-ne’e akontese iha eskola 30 agostu nia oin tanba motor soke ema lao ain. Depois akontese ita evakua ba kedan ospitál depois iha tiha ospitál mak vítima ne’e iis kotu¨, nia konklui.
Jornalista: Natalino Costa
Editór : Zezito Silva