iklan

MUNISÍPIU, VIKEKE

Udan fó impaktu ba ponte Metauai, difikulta komunidade Uatucarbau

Udan fó impaktu ba ponte Metauai, difikulta komunidade Uatucarbau

VIQUEQUE, 03 janeiru 2025 (TATOLI)-Akontese udan bo’ot, sesta kalan (03/01), halo mota estraga ponte Metauai ne’ebé liga postu administrativu Uatucarbau no daudauk ne’e difikulta movimentasaun transporte no komunidade sira.

Komandante Eskuadra Uatucarbau, Jacob Amaral, relata, daudauk ne’e ponte Metauai liga ba postu Uatucarbau kotu, impaktu husi udan-boot iha horikalan.

“Ponte ne’e kotu horikalan udan boot, mota tuun, halo ponte kotu. Ha’u haree agora transporte motorizada nian fatin de’it, maibé orsida udan entaun motorizada sira mós labele. Enkuantu ponte ne’e dadauk ne’e karreta sira husi Uatucarabu no husi Uatulari ba Uatucarabu labele liu”,Jacob Amaral, ba TATOLI, iha postu Uatucarbau, ohin.

Komadante PNTL eskuadra Uatucarbau ne’e prefere, atu parte relevante sira presiza aselera rezolve ponte Metauai tanba dalan ne’e úniku, ne’ebé hadi’a, fasilita movimentu transporte sira entre Uatulari no Uatucarbau.

“Ha’u hanoin parte relevante sira orsida aselera hadi’a, atu moras emerjénsia ruma transporta ba Viqueque karik, labele difikulta ba ambulánsia”, nia hato’o.

Iha fatin ketak, Xefe suku Irabin de Baixo, José Baptista do Carmo, haktuir, ponte Metauai kotu, difikulta komunidade sira tanba agora dadauk mate-isin rua iha hela suku Irabin de Baixo, karru funeráriu atu ba haloot.

“Nune’e, ohin ami-nia komunidade sira esforsu lalin besi husi Uatucarbau tula iha ponte mak karru funeráriu. Maibé, ba karreta sira seluk labele liu. Tanba ne’e, ha’u nu’udar autoridade lokál hakarak husu parte relavante atu halo normaliza lalais”, nia sujere.

Autoridade lokál ne’e reforsa, presiza halo normalizasaun ponte Metauai ne’ebé kotu dadauk ne’e, se la hadi’a lalais sei difikulta estudante sira-ne’ebé atu fila bs Dili eskola labele la’o tanba agora estudante universitáriu barak mak iha postu.

“Ponte ne’e importante ita tenke normaliza lalais, atunune’e labele difikulta ba movimentu sira,” nia dehan.

Jornalista : Vitorino Lopes da Costa
Editór : Rafael Ximenes de A. Belo

 

iklan
iklan

Leave a Reply

iklan
error: Content is protected !!