DILI, 03 janeiru 2025 (TATOLI) – Ekipa konjunta Sekretaria Estadu Asuntu Toponímia no Organizasaun Urbana (SEATOU) halo despezu administrativu ba uma hamutuk 360 iha Aldeia Foementu II Comoro, tanba iha ameasa mota estraga no halakon moris populasaun.
“Ita mai fó apoiu ba sira atu bele normaliza fatin. Iha setembru liubá tinan kotuk ita halo enkontru boot ida iha ponte CPLP, fó hanoin ba sira iha tempu bailoron sira sai husi fatin ne’e ona, buka fatin seluk hodi ita bele haree situasaun. maibé ita-nia maluk sira lakohi sai, ita haree iha ita nia kotuk, bee tama hela iha okos, ai-riin tohar ona, tanba ne’e ita mai ajuda sira muda sai husi fatin ne’e atu kompania hadi’a morru protesaun mota nian,” Sekretariu Estadu Asuntu Toponímia no Organizasaun Urbana (SEATOU), Germano Santa Brites ba jornalista sira iha Fomentu II, Comoro.
Governante ne’e esplika, kompania hadi’a para iha leten, tanba sira lakohi sai husi fatin, tanba ne’e mak ohin ekipa mai halo servisu.
“Ita husu obrigatoriamente, sira sai husi fatin ne’e, ohin ne’e ba oin, fatin sira tenki hamamuk ita atu hadi’a fatin. Iha uma-kain 259, hela uma-kain lima mak seidauk tau nomor. Ita hakarak atu sira bele koopera, sira hasai sira-nia nia sasan to’o meiu-dia, makina halo serbisu iha ne’e,” nia dehan.
Germano Brites reitera, prepara karreta tula sira ba sira-nia nia fatin, se husi Munisípiu kareta tula hela sira ba.
Tuir Sekretariu Estadu, sei sobu to’o marsu ba fatin risku sira ne’e atu hadi’a hodi labele estraga estrada no sidade.
Iha fatin hanesan, Xefe suku Comoro, Elogio José da Silva Marçal, relata iha suku Comoro iha fatin tolu mak afeta liu ba ameasa mota sobu.
“Haree ba iha suku Comoro aldeia ne’ebé mak afetadu liu mak aldeia Fomento I no II no Moris Foun iha mota-ibun. Iha populasaun hamutuk 59 iha Fomento II no Moris Foun mak hetan inundasaun no muda ba bombeiros fatin. Ita tenki koopera ho ekipa konjunta SEATOU,” nia haktuir.
Autoridade lokál ne’e hateten, se komunidade lakoopera bele hamosu problema seluk, bele mate. Sorte iha ne’e mota estraga de’it sasan.
“Ha’u hanesan xefe suku Comoro, husu komunidade sira ne’ebé hela iha fatin risku. Tanba buat ne’e antes tiha ona, ita halo diálogu,” nia apela.
Rezidente Rogerio Pereira, haktuir katak antes amu Papa mai ne’e sira halo ona reuniaun ida iha ponte okos CPLP nian, SEATOU rasik ho Munisípiu Dili no autoridade lokal fó avizu ona ba sira.
“Atu halo Sidade furak, laiha ema ida kontra Estadu, maibé ami presiza tempu atu sai,” nia dehan.
Jornalista: Jesuína Xavier
Editór: Rafael Ximenes de A. Belo