iklan

POLÍTIKA

Deputadu komisaun A husu KFP implementa lei reforma obrigatóriu

Deputadu komisaun A husu KFP implementa lei reforma obrigatóriu

Deputado FRETILIN, Joaquim dos Santos. Imajen Tatoli/Egas Cristóvão

DILI, 06 janeiru 2025 (TATOLI)—Deputadu membru komisaun A trata asuntu Justisa no Konstituisionál iha Parlamentu Nasionál (PN), Joaquim dos Santos ‘’Boraluli, husu Governu no Komisaun Funsaun Públika (KFP) atu implementa ona lei reforma obrigatóriu ba funsionáriu públiku no ajente administrativu iha administrasaun públika.

PN aprova ona lei ne’e no hetan ona promulgasaun husi Prezidente Repúblika (PR) iha tinan kotuk, nune’e fó tempu ba Governu no KFP prepara regra implementasaun tuir prazu ne’ebé iha nune’e bele halo ona implementasaun tanba lei ne’e importante tebes ba reforma administrasaun públika.

“Ha’u hanoin importante tebes, tanba ita restaura independénsia tinan 20-resin ona ne’ebé serbisu administrasaun públika ne’e presiza halo reforma ba funsaun públiku ba funsionáriu sira, tanba funsionáriu balun idózu loos ona idade avansadu. Tuir loloos, sira tenke deskansa maibé presiza polítika foun sira bele deskansa. Entaun, iha ona lei ba reforma obrigatóriu atu haree sira-ne’ebé to’o ona idade 65 no antes to’o idade ne’e sira bele hatama ona sira-nia rekerimentu. Purtantu, hahú lei ne’e tama vigór sira bele prepara dokumentu, sira hato’o atribui direitu ba reforma,” nia hateten ba Agência TATOLI iha resintu PN, segunda ne’e.

Nia husu atu implementa reforma ne’e hanoin administrasaun públika tenke identifika funsionáriu sira-ne’ebé merese atu hetan direitu ba reforma hodi kria kondisaun antesedente, nune’e funsionáriu sira ba reforma ne’e fatin labele mamuk.

Tenke kria kondisaun loke rekrutamentu foun ka funsionáriu foun sira atu prepara, pelumenus iha avizu antesedente tinan ida, nune’e ema sira-ne’ebé hakarak sai funsionáriu públiku bele mai aplika ba fatin ne’ebé mamuk hodi prense fali ba funsionáriu atuál ne’ebé tama reforma ona.

Nune’e, nia dehan, rekrutamentu tenke prepara ba joven sira-ne’ebé prontu hela atu ba serbí Estadu liuhusi administrasaun públiku.

“Labele lei ne’e vigór, aban ka bainrua, funsionáriu sira reforma sai hotu tiha, sira-nia fatin mamuk laiha ema,” nia dehan.

Tuir dadus husi Komisaun Funsaun Públika (KFP), daudaun ne’e, rejista funsionáriu públiku no ajente administrativu na’in-2235 ho idade 65.

Iha 08 Outubru 2024, Parlamentu Nasionál (PN) liuhusi reuniaun plenária aprova proposta-lei númeru 11/VI(1a)-Autorizasaun lejislativa iha mateira fisasaun limite idade ba relasaun serbisu funsionáriu públiku no ajente administrativu ne’ebé iha autorizasaun lejislativa ne’e define idade 65 reforma obrigatóriu.

Ba autorizasaun lejislativa ne’e hetan ona promulgasaun husi Prezidente Repúblika (PR) iha 15 Outubru 2024.

“Iha autorizasaun lei ne’e ko’alia kona-ba reforma obrigatóriu ba funsionáriu públiku no ajente, iha ne’ebá se ita kaer husi idade 65, tanba númeru ne’e depende 60 ka 65. Maibé, autorizasaun fó ne’e dehan katak tenke idade 65. Prontu, se ita kaer ba idade 65, entaun agora daudaun iha 2235 mak tama ona iha idade 65. Husi ne’e, parese 40-resin ajente administrasaun,” rezidente KFP, Agostinho Letêncio de Deus, hateten ba Agênsca TATOLI iha resintu PN (25/10/2024).

Nia informa, Prezidente Repúblika promulga tiha autorizasaun lejislativa ne’e iha 15 outubru 2024 no daudaun ne’e komisaun prepara ona dekretu-lei sira oinsá implementasaun reforma obrigatóriu inklui diskusaun sira kona-ba bainhira mak hahú tama ba reforma inklui iha reintegrasaun ruma.

Komisaun hahú identifika ona bazeia ba sistema iha ministériu sira-ne’ebé mak funsionáriu barak-liu no husi ne’e preparasaun ida tuir mai mak se reforma 2235 karik, presiza rekruta fali hira.

Entaun, situasaun ne’e komisaun la ko’alia de’it reforma maibé ko’alia mós etapa tuir mai hira mak tenke tama fila-fali no ministériu ida-ne’ebé mak reforma ba funsionáriu barak liu, nune’e tenke halo estudu.

“Ne’ebé, daudaun ne’e KFP sei serbisu hamutuk iha ekipa entre KFP, Ministériu Finansa, Seguransa Sosiál atu bele haree hela funsionáriu sira-ne’ebé mak tama ona ba idade reforma,” nia dehan.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!