COVALIMA, 06 Janeiru 2025 (TATOLI) – Estudante foun 540 husi Eskola Sekundária Jerál Públiku Suai partisipa orientasaun akadémika tinan 2025. Iha atividade ne’e, Edukasaun Covalima mós partilla informasaun kona-ba prespetiva kualidade edukasaun iha futuru ba alunu sira.
Reprezentante Diretór Servisu Munisipál Edukasaun Covalima, Florindo do Carmo, dehan, atu garante kualidade edukasaun depende ba kandidatu alunu sira mak aproveita oportunidade atu aprende iha eskola.
“Ita ko’alia kona-ba kualidade edukasaun depende ba alunu idaidak, presiza tuir manorin sira-nia orientaun, la’ós tuir ita-boot sira-nia hakarak no manorin sira mós labele hamosu diskrimisaun iha eskola”, Florindo do Carmo dehan bainhira fó palestra ba kandidatu alunu sira iha Suai, ohin.
Nia dehan estudante sira ne’e mai husi eskola bázika ne’ebé la hanesan, tanba ne’e presiza aproveita oportunidade iha eskola no la’os la tuir prosesu aprendijazen no uza motór hodi pasiar bá-mai no binhira la pasa iha ezame maka fó sala ba manorin sira.
“Alunu sira presiza reflete ita-boot sira nia aan, tanba situasaun agora ne’e eskola mak buka alunu sira, maibé iha ami nia tempu ami mak buka eskola, tanba ne’e alunu sira presiza aproveita oportunidade, nune’e labele arrepende”, nia fó hanoin.
Diretór Eskola Sekundária Públiku Suai, Fernando Ferreira, dehan bazeia ba sikulár ne’ebé eskola simu husi Ministériu Edukasaun, iha 2025 ne’e, simu de’it kandidatu alunu 540.
“Ha’u atu dehan katak prosesu orientasaun diferente ho tinan sira seluk, tanba ita konvida oradór sira hodi partilla sira-nia esperiénsia hanesan husi edukasaun mak partilla kona-ba perspetiva kualidade edukasaun iha futuru”, dehan.
Iha sorin seluk, Prezidente Konsellu Estudantíl, Júlio Cardoso, esplika eskola hala’o orientasaun hodi konvida autoridade importante sira atu fahe esperénsia ba alunu sira, nune’e bele hasa’e sira-nia koñesimentu iha área oioin.
“Tuir planu, durante hala’o orientasaun ami konvidade autoridade importante sira hanesan, husi Edukasaun partilla esperiénsia kona-ba Papél Edukasaun ba Futuru Covalima, konvida Prezidente Autoridade Covalima hodi ko’alia kona-ba Dezenvolvimentu no Implementasaun Desentralizasaun Administrativa”, dehan.
Eskola mós konvida Komandu PNTL Covalima hodi partilla informasaun kona-ba sinál tránzitu ba alunu sira, konvida Servisu Munisipál Saúde hodi ko’alia kona-ba prevensaun moras HIV/SIDA no husi arte muzeu ko’alia sobre istória Timór ba alunu sira.
“Razaun ami konvida hodi partilla informasaun, tanba asuntu ne’ebé ami eskolla importante ba alunu sira hodi hasa’e sira-nia koñesimenetu molok sira tuir prosesu aprendijazen ho normál iha eskola”, salienta.
Jornalista: Celestina Teles
Editora: Maria Auxiliadora