COVALIMA, 06 Janeiru 2025 (TATOLI) – Polísia Nasionál Timor-leste (PNTL) munisípiu Covalima rejista kazu hitu durante selebrasaun loron boot Natál no tinan foun, informa Komandante PNTL Covalima, Superintendente Polísia Calisto Gonzaga.
Nia salienta katak kazu ne’ebé rejistu ne’e la grave, nune’e komandu la informa ba nasionál, tanba PNTL rejista kazu hanesan ema hemu tua hodi provoka malu no PNTL halo kedas atuasaun.
“Kazu hitu ne’ebé komandu rejista iha Natál kazu tolu no tinan foun haat ho tipu kazu ne’ebé la grave”, Superintendente Polísia ne’e dehan iha Santa Rosa, ohin.
PNTL Covalima rejista de’it kazu hitu, tanba komandu koloka membru 200 ne’ebé hetan apoia seguransa husi Unidade Polísia Marítima (UPM), UPF no Falintil-Forsa Defeza Timor-Leste (F-FDTL) iha fatin sira hanesan igreja no tasi-ibun Suai Loro no seluk tan.
“Ita troka planu operasaun haree ba asuntu seguransa. Ita haree uluk rekursu umanu 200 mak fó seguransa, ne’ebé ajuda husi F-FDTL destaka iha postu administrativu Tilomar, UPF, UPM hodi koloka bá fatin identifikadu sira”, dehan.
Kazu ne’ebe PNTL rejista mak hanesan komunidade hemu tua no lanu hodi provoka malu, ne’ebé akontese iha suku Tashilin, postu Zumalai, iha suku Suai Loro, postu Suai no iha Ogues, iha postu Maucatar ne’e, komunidade sunu petasan halo liman kotu.
“Ita-nia komunidade fó importánsia hodi selebra Natál no tinan foun ho família, maibé ami hakfodak kazu sunu fugete shot 20 iha loron 31 Dezembru la konsege sai, nune’e estraga sidadaun na’in-ida nia liman no ita lori kedan bá Ospitál Nasionál Guido Valadares”, nia relata.
Tanba ne’e, Komandu PNTL Covalima alerta ba empreza sira atu labele importa ona fugete, tanba agora la’ós ona tempu atu sunu fugete.
Jornalista: Celestina Teles
Editora: Maria Auxiliadora
