DILI, 06 janeiru 2025 (TATOLI) – Diretór Servisu Edukasaun Munisípiu (SEM) Dili, Sabino da Costa Pereira husu halais pedidu apoiu karteira eskolár ba estabelesimentu ensinu sira iha Dili.
“Halais prosesu atendimentu ba SEM nia pedidu hanesan apoiu meza no kadeira ba eskola sira ne’ebé hetan projetu komunitáriu kompañia entrega ona save ka inaugura ona fulan tolu ona maibé kadeira meza seidauk iha,” nia dehan iha Sentru Konvensaun Dili (CCD), segunda ne’e.
Dirijente ne’e dehan, ME presiza aselera nune’e iha anu letivu ne’e estudante bele utiliza hodi ba prosesu aprendizajen.
Alende ne’e mós nia husu ba Ministra Edukasaun, Dulce de Jesus Soares ho Sekretáriu Estadu Ensinu Sekundáriu Jerál Tékniku Vokasionál, Domingos Lopes Lemos, katak, SEM Dili espera sei simu tan kolokasaun ba dahaat ho númeru ne’ebé boot hodi responde ba eskola sira ne’ebé sei persiza manorin.
“Ministra Edukasaun no Sekretáriu Estadu Ensinu Sekundáriu Jerál Tékniku Vokasionál ne’ebé uza ita-boot sira nia matenek hakarak hadi’a Ministériu Edukasaun ida-ne’ebé kualidade, loke vagatura bolsa kandidatura ba nível Pre-eskolár no Ensinu Báziku hamutuk ho Komisaun Funsaun Públika kria Sistema teste elektrónika ida-ne’ebé difisil atu manipula no halo kedas kolokasaun to’o faze datoluk hodi responde ba kuadru pesoál kada eskola, espera katak faze dahat iha tempu badak sei koloka tan. Nune’e SEM Dili espera sei simu tan kolokasaun ba daha’at ho numeru ne’ebe bo’ot hodi responde ba eskola sira nebe sei persiza manorin,” nia dehan.
SEM no Inspesaun Munisipiu Dili devolve osan Konsensaun Eskolár ba kofre Estadu
Diretór Edukasaun Munisípiu Dili dehan SEM no Inspesaun Munisípiu Dili devolve osan Konsensaun Eskolár no Merenda eskolár hamutuk $157. 371,75 ba kofre Estadu.
“Dirasaun SEM Dili ho Inspesaun Munisípiu Dili konsege identifika, rekolla no devolve osan konsensaun eskolár no Merenda Eskolár tinan 2022 ne’ebe toba hela iha brankas eskola no iha konta bankaria eskola ba kofre estadu liu husi BNCTL ho montante $157. 371,75,” nia dehan.
Ezekusaun Orsamentu Programa Merenda Eskolár 2024 ba Ensinu Pre-Eskolár no EB konsege ezekuta 90,53% no 9,47% devolve ba kofre estadu. Ezekusaun Orsamentu Konsensaun Eskolár 2024 ba EPE no EB konsege ezekuta 92% no 8% devolve ba kofre Estadu.
“Ita-nia programa merenda eskolár Q1 la implementa tanba formasaun ba EIP halao iha Q2 no foin aumenta tan EJP 7 ba eskola katóliku, hodi labele kobre ba dias efetivus tuir kalendariu. Relatoriu PME no KE husi eskola balu atraza prejudika SEM Dili hodi halo proposta orsamentu tuir mai tanba iha fukun balu seidauk rezolve,” nia dehan.
Jornalista : Osória Marques
Editór: Rafael Ximenes de A. Belo
