iklan

EKONOMIA, HEADLINE

MF ofisialmente loke sistema ba ezekusaun OJE 2025

MF ofisialmente loke sistema ba ezekusaun OJE 2025

Ministra Finansa, Santina José Rodrigues Viegas Cardoso, akompaña hosi Primeiru-Ministru Kay Rala Gusmão, distribui dekretu lei ezekusaun no pakote aprovadu OJE 2025 ba orgaun estadu liña ministériu no instituisaun estadu sira, iha salaun Ministériu Finansas, tersa (07/01). Imajen Tatoli/Francisco Sony

DILI, 07 janeiru 2025 (TATOLI)Ministériu Finansa (MF) liuhusi Diresaun Jerál Tezouru, tersa ne’e, divulga dekretu-lei kona-ba ezekusaun Orsamentu Jerál Estadu (OJE) tinan 2025, ba klasifikasaun orsamentál no mapa kontabilidade 2025 ba ministériu no instituisaun Estadu hotu.

“Ministériu Finansa konvida ita-boot sira atu mai iha fatin ne’e hodi hetan pakote OJE promulgadu ba entidade orsamentál hotu inklui informasaun kona-ba regra no prosedimentu ne’ebé sei iha ezekusaun orsamentu ne’e no ofisialmente sei loke sistema Government Resource Planning (GRP) freebalace hodi permite hahú ezekuasaun iha tinan 2025 ne’e inklui divulga dekretu-lei ezekuasaun OJE 2025 nian,” Diretór Jerál Planeamentu no Orsamentu husi MF, José Alexandre de Carvalho, informa, iha Auditóriu MF, Aitarak-laran.

Notísia relevante : PN aprova proposta OJE 2025 biliaun $2,6 iha finál globál ho votu afavór 42

Atividade ohin permite entidade hotu hatene katak tinan finaseiru ida lori tinan-tolu mak termina, tanba ne’e OJE 2025 nia preparasaun, diskusaun no aprovasaun realiza ona iha tinan 2024.

Nune’e, agora tinan 2025 ba tinan faze implementasaun no ezekusaun nian sei hala’o simultadu ho atividade monitorizasaun no fiskalizasaun interna husi ida-idak ninia órgaun monitorizmu no fiskalizasaun iha ida-idak nia entidade orsamentál.

Faze ikus liu, tinan datoluk nian mak iha tinan 2026 nu’udar tinan responsabilizasaun ba konta jerál OJE 2025 nian ne’ebé ninia pontu kumbinante mak sei iha edisaun relatóriu pareser konta jerál Estadu no sei iha faze apresiasaun ba konta referidu iha Parlamentu Nasionál.

Iha fatin hanesan, Primeiru-Ministru (PM) Kay Rala Xanana Gusmão, husu ba instituisaun Estadu sira atu ezekuta orsamentu 2025 tuir nia dalan.

“Hotu-hotu hatene osan povu nian jere ho di’ak signifika saida de’it mak ita halo tenke fó benefísiu ba povu,” nia fó hanoin.

Xefe Governu dehan, bainhira Estadu ida jare orsamentu ladi’ak maka ema sei temi Estadu frajíl, siginfika instituisaun Estadu la’o la tuir regra.

“Papél responsável entidade sira-nian mak atu asegura despeza públika gasta tuir regra, dalan no lei tanba bainhira jere orsamentu povu ne’e ho di’ak ba duni planu prioridade sira ne’ebé iha mak fó benefísiu di’ak ba ita-nia jerasaun sira ne’ebé sei mai, ida-ne’e ita hotu nia responsabilidade,” PM hato’o.

Antes ne’e, Parlamentu Nasionál iha loron 20 novembru 2024, aprova proposta-lei númeru 12/VI(2a) OJE 2025 ho montante biliaun $2,6 iha finál globál ho votu afavór 42, kontra 23 no abstensaun 0.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!