DILI, 07 janeiru 2025 (TATOLI)—Parlamentu Nasionál (PN) liuhusi reuniaun plenária, tersa ne’e, aprova votu númeru 1//2025, pezár ba falesimentu Tom Hyland.
Notísia Rlevante:Estadu Timor-Leste haloot ona saudozu Tom Hyland iha semitériu Becusse
“Rezultadu votasaun votu númeru 1//2025, pezár ba falesimentu Tom Hyland afavór 49 kontra no abstensaun zero,” Prezidente Parlamentu Nasionál Interina no atuál Primeira Vise Prezidente PN, Maria Teresinha Viegas, fó sai iha sala plenária PN.
Tuir testu votu pezár ne’ebé sekretária meza PN, Deputada Virgínia Anabelo, lee sai katak Tom Hyland hakotu iis iha 24 dezembru 2024.
Tom Hyland moris iha Irlandia 12 outubru 1952, no tinan 1992 Tom Hyland funda iha Dublin Irlandia East Timor solidarity campaign ho funsaun okupasaun ilegál Timor-Leste husi forsa armada Indonézia, espor kumplisidade Governu osidentál iha apoiu militár no diplomátiku ba rejime Soeharto iha Indonézia no defende direitu umanu inklui direitu auto-determinasaun povu konforme iha deklarasaun universal direitu umanu.
Entre 1994-1999 organiza manifestasaun oioin iha Dublin Irlandia no sidade sira europeia ba apoiu kauzaTimor-Leste (TL) no presta asisténsia krusiál ativista timoroan ne’ebé buka refuzu husi rejime opresivu Indonézia, ajuda hodi hetan azílu iha Irlándia, Portugál no Reinu Unidu.
Hafoin TL indepedénsia, Tom Hyland kontinua kontribui ba dezenvolvimentu nasaun TL no dezenvolvimentu relasaun internasionál dezempeña papél fundamentál iha promosaun forte lasu bilateral entre TL ho Irlándia.
Nu’udar apoiante ativu iha inisiativa barak sosiedade sívil inklui sentru audivizuál Max Sthal TL, iha ne’ebé apoiu prezerva patrimóniu istóriku no kulturál nasaun TL.
Tom Hyland nu’udar konsúl onoráriu Irlándia iha TL no to’o loron nia hakotu iis dezempeña funsaun profisionál iha Ministériu Negósiu Estranjeiru no Kooperasaun (MNEK).
Ba kontribuisaun kauza TL, Tom Hyland hetan kondekorasaun iha 30 agostu 2009 ho medalla méritu liuhusi dekretu Prezidente Repúblika númeru 24/2009 públika iha jornál repúblika.
Nune’e, PN reuni iha sesaun plenária espresa ninia sentidu profundu pezár ba falesimentu Tom Hyland no enderesa sentidu kondolénsia ba ninia família no amigu enlutada.
Deputadu CNRT, Duarte Nunes, hateten nu’udar proponente ba votu pezár ne’e tanba TL hanesan nasaun ida hetan ukun-an hafoin luta tinan 24 nia laran, TL hetan apoiu husi ema barak no Tom Hyland ida mós fó nia kontribuisaun antes no depois TL ukun-an mós nia kontribui nafatin, ne’ebé TL fó kondekorasaun ba nia no nomeia nia hanesan konsúl onoráriu.
“Ida ne’e fó apoiu ba ita-nia ukun an. Ita presiza hatene no agradese ema sira-ne’ebé fó nia kontribuisaun, tanba ne’e Tom Hyland nia kontribuisaun boot tebes. Ita-nia maluk barak ba refujia ba iha Irlandia, tanba sira-nia kontribuisaun, espera katak maluk sira fó votu afavór,” nia dehan.
Jornalista : Nelson de Sousa
Editór : Cancio Ximenes