VIQUEQUE, 08 janeiru 2025 (TATOLI)- Bee Timor Leste, Empreza Públika (BTL,E.P) Munisípiu Viqueque hahú husi Janeiru to’o Dezembru 2024, konsege rekolla reseita husi taxa fornesimentu bee-moos ba komunidade iha kapitál munisípiu Viqueque hamutuk $23,339.30, hodi hatama ba kofre Estadu.
“Ami konsege rekolla reseita $23,339.30. Reseita ida-ne’e ami kompara ho reseita 2023 nian a’as liu. Reseita tinan 2024 tun oituan tanba iha fulan outubru no novembru rekursu bee matan menus, ne’ebé ami karrega bee ba tánke rezervatóriu sentrál kuaze oras neen nian laran mak foin distribui ba konsumidór sira. Entaun, metru kontadór sira-ne’e la’o ladun normál tanba ne’e ita-nia reseita tun”, hateten Koordenadór BTL,E.P munisípiu Viqueque, Marito da Costa, ba TATOLI, iha Beloi, ohin.

Atu hasa’e reseita, Koordenadór BTL,E.P ne’e dehan ba tinan 2025 sei esforsu monta tan metru kontadór ba uma-kain 500 iha kapitál munisípiu Viqueque, hodi hasa’e reseita ba kofre Estadu.
Maibé, problema rekursu bee matan Lohinu ne’ebé antes 20 litru pursegundu, daudaun udan ona, rekursu bee matan tun ba 11 litru pursegundu ne’ebé sei fó impaktu ba reseita.
“Tanba ne’e, ami buka alternativu balun ne’ebé ami halo hakarak foti tán rekursu bee husi mota, maibé seidauk hetan aprovasaun, ita espera ba futuru bele realiza hodi reforsa bee matan Loihunu”, nia espera.
Aleinde ne’e, iha tinan 2024 BTL,E.P konsege monta metru kontadór hamutuk 665 ba uma-kain sira iha kapitál Viqueque.
“Dezafiu ne’ebé ami hasoru iha tinan 2024, menus rekursu servisu liuliu ofisiál tékniku, ofisiál leitór kontadór no apoia kliente. Rekursu ne’ebé ami iha daudaun ne’e maioria tékniku operadór. Maske, ami menus rekursu umanu, maibé ida-ne’e la’ós sai bareira ba ami, ami sei kontinua esforsu hodi hasa’e reseita iha tinan 2025”, nia kompromete.
Daudaun ne’e, rekursu ka funsionáriu iha BTL,E.P munisípiu Viqueque na’in-14 hodi halo atendimentu bee-moos ba komunidade sira.
Jornalista : Vitorino Lopes da Costa
Editór : Florencio Miranda Ximenes