iklan

EKONOMIA, HEADLINE

CESLINK seidauk konsege halo operasaun maski rejistadu iha tinan-tolu liubá

CESLINK seidauk konsege halo operasaun maski rejistadu iha tinan-tolu liubá

Prezidente ANC, Flávio Cardoso Neves. Imajen Tatoli/António Daciparu

DILI, 08 janeiru 2025 (TATOLI)—Operadór telekomunikasaun, CESLINK seidauk konsege presta nia servisu iha Timor-Leste hafoin simu sertifikadu rejistu husi Governu liuhusi Autoridade Nasionál Komunikasaun (ANC, sigla portugés), iha loron 16 novembru 2021.

Prezidente ANC, Flávio Cardoso Neves, haktuir, Governu anteriór konsege atribui sertifikadu hafoin operadór ne’e kompleta rekizitu oin-oin tuir lei artigu 30 númeru 15/2012.

“Governu anteriór fó ona sertifikadu rejistu ba sira maibé molok hahú operasaun sira tenke iha espektru, maibé sira seidauk aplika ba ida-ne’e no to’o ohin loron espektru ne’e seidauk to’o mai,” Prezidente ANC informa ba Agência Tatoli iha ninia knaar fatin, Mercadu-lama, kuarta ne’e.

Notísia relevante : ANC atribui ona sertifikadu rejistu ba operadór Ceslink

Tuir kritériu bainhira atribui ona lisensa, CESLINK tenke selu impostu regulár 2% anualmente ba ANC.

CESLINK sira mós tenke hatama aplikasaun ba ANC atu hetan lisensa no sai na’in ba númeru telefone no lisensa espektru nian.

Bainhira lisensa liu prazu mensionadu iha sertifikadu mak CESLINK seidauk halo aprezentasaun ruma, mak sei halo fali revizaun ida atu nune’e bele hahú fali prosesu husi inísiu.

“Karik liu tiha tinan-rua ka tolu mak sira la halo asaun ruma, entaun ANC nu’udar órgaun reguladór sei halo revizaun fali hodi foti fali sertifikadu rejistu ne’ebé iha no tenke halo aplikasaun foun,” nia akresenta.

Prezidente ANC iha biban ida ne’e, husu ba operadór telekomunikasaun ne’e atu haree hodi prosesa lalais pedidu espektru tanba etapa lubuk ida mak liu ona.

Iha loron 19 dezembru 2023, CESLINK S.A aprezenta ona proposta planu investimentu setór telekomunikasaun ho montante millaun $5 ba Ajénsia Promosaun Investimentu no Esportasaun (TradeInvest Timor-Leste).

Aleinde ne’e iha, loron 30 janeiru 2024, TradeInvest Timor-Leste mós halo ona konsulta kona-ba prosesu rejistu ba Akordu Investimentu Espesiál (AEI) entre Governu Timor-Leste ho CESLINK, S.A.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!