VIQUEQUE, 08 janeiru 2025 (TATOLI)-Komisáriu CNE destakadu munisípiu Viqueque, Olavio da Costa Montero Almeinda, imforma Eleisaun ba suku foun rua hanesan Macadique de Baixo no Macadique Uatame, iha postu Uatulari, munisípiu Viqueque, realiza iha loron 25 Janeiru 2025.
Nune’e, Komisaun Nasionál Eleisaun (CNE, sigla portugés) Munisípiu Viqueque, hala’o edukasaun sívika ba eleitór sira iha suku foun hanesan Macadique de Baixo no Macadique Uatame, iha postu Uatulari, munisípiu Viqueque.
Prosesu eleisaun ne’e responsabiliza husi PAM ho akompanamentu husi parte CNE no Sekretáriu Tékniku Administrasaun Eleitorál (STAE).
“Ita realiza eleisaun suku ne’e la’ós foin maka ita partisipa, maibé eleisaun ida agora ne’e hodi deside futuru suku foun rua ne’ebé eziste iha postu Uatulari. Entaun, liuhusi edukasaun sívika ida-ne’e atu ita-nia eleitór sira labele vota sala”, Komisáriu CNE destakadu munisípiu Viqueque, Olavio da Costa Montero Almeinda, hateten ba jornalista sira, iha aldeia Betulari, suku Macadique de Baixo, Uatulari, ohin.
Objetivu husi edukasaun síviku ne’e atu eleitór sira tuan no foun sira partisipa votasaun ba aleisaun suku foun hodi garante prosesu ne’e la’o susesu.
“Ha’u husu eleitór sira husi suku foun rua referida atu partisipa eleisaun ne’e ho di’ak”, nia sujere.
Iha fatin hanesan, Administradór Postu Uatulari, Jorge Ribeiro, agradese ba parte CNE ne’ebé fó ona edukasaun sivíka ba eleitór sira husi suku foun rua atubele partisipa eleisaun komunitária ho susesu.
“Ha’u hakarak hato’o ba ita-nia komunidade sira suku Macadique de Baixo no Macadique Uaitame atu paritispa eleisaun suku ne’ebé sei partisipa eleisaun iha loron 25 Janeiru 2025”, nia sujere.
Kona-ba aprezentasaun kandidatu xefe suku ba suku rua tenke aprezenta dokumentu kandidatu nian ba STAE iha loron 10 Janeiru.
Iha biban ne’e, Koordenadór suku Madique Uaitame, José Pinto Soares, salenta, edukasaun sivíka ne’ebé CNE oferese ba eleitór sira hodi aprtisipa eleisaun hili lideransa suku bele la’o ho susesu, nune’e implementa dezenvolvimentu iha suku rua, iha futuru mai.
“Ami bele partisipa eleisaun ne’ebé realiza iha ami-nia suku rua ne’e. Nune’e ami mós sei organiza ami-nia komunidade sira partisipa iha eleisaun no husu labele mosu barullu iha tempu eleisaun”,nia garante.
Tuir dadús eleitór husi suku Macadique de Baixo, aldeia hitu totál eleitór 2,668 no suku Macadique Uaitame totál aldeia hamutuk 6 ho totál eleitór 1, 253.
Jornalista : Vitorino Lopes da Costa
Editór : Florencio Miranda Ximenes
