DILI, 08 janeiru 2025 (TATOLI)—Prezidente Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P, sigla portugés), Ana Paula da Cruz, aprezenta lejislasaun sertifika ekipamentu pezadu ne’ebé prepara hela atu bele fasilita liután serbisu ba instituisaun ne’e, ba Komisaun E trata asuntu Infraestrutura iha Parlamentu Nasionál (PN).
“Iha fulan neen ba kotuk, ami aprezenta ona ami-nia planu no serbisu ba komisaun E, iha ne’eba sira preokupa ho ami tanba sira kestiona atu prepara lei, nune’e bele fó forsa ba IGEADE, I.P hala’o ninia serbisu. Tuir planu ne’ebé ami aprezenta, ita hatene lei ida anterior, lei númeru 11/2016 fó ba IGEADE, I.P atu konserva de’it mákina ho mós rentabilizasaun ka fó aluga, labele halo serbisu sira seluk. Tan ne’e, prepara ona lei, ohin ami aprezenta lei ida ne’e fó biban ba IGEADE,” nia hateten ba jornalista sira hafoin ramata enkontru ho komisaun E trata asuntu Infraestrutura iha Parlamentu Nasionál (PN), kuarta ne’e.
Ho lejislasaun ne’ebé aprezenta fó tan bibán ba IGEADE, I.P bele hala’o serbisu sira seluk hanesan formasaun ba operadór sira bele lori ekipamentu pezadu ho nia kategória no nia risku ne’e aas.
Lei ida-ne’e mós atu sertifika kompañia sira-ne’ebé hala’o serbisu iha territóriu lori sira-nia mákina pezadu, tanba tinan 20-resin ona kompañia barak mai hala’o serbisu lori ekipamentu ho gratuitu no lori operadór husi rai-li’ur no oinsá konsidera mós operadór timoroan.
“Operadór sira-ne’ebé mak lori mákina pezadu iha territóriu laiha karta kondusaun, tanba karta kondusaun ida-ne’ebé mak Ministériu Transporte no Komunikasaun (MTK) atribui ne’e ba karta lizeiru de’it, tanba ne’e lejislasaun ne’ebé prepara sei haree,” nia hateten.
Inisiativa lei ne’e hato’o ona ba Ministru Obra Públika (MOP) no tenke hetan aprovasaun husi Konsellu Ministru (KM) hafoin implementa, tan ne’e ohin aprezenta ba komisaun bele iha koñesimentu.
Enkuantu, antes ne’e IGEADE, I.P realiza ona programa pilotu ba formasaun sai operadór ba tipu mákina pezadu ba ema na’in-30, no bainhira lejislasaun ne’ebé prepara aprovadu ona mak sei kontinua formasaun.
Jornalista : Nelson de Sousa
Editór : Cancio Ximenes