DILI, 08 janeiru 2025 (TATOLI)—Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P, sigla portugés) prontu atende situasaun emerjénsia iha tempu udan iha territóriu.
“Situasaun emerjénsia ne’e serbisu rutina IGEADE, I.P nian, tina-tinan ita sempre hasoru udan, ita iha operadór, mákina bainhira ita rona iha ne’ebé tenke tun. Populasaun husu, ita tenke tun,” Prezidente IGEADE, I.P, Ana Paula da Cruz, hateten ba jornalista sira hafoin ramata enkontru ho komisaun E trata asuntu Infraestrutura iha Parlamentu Nasionál (PN), kuarta ne’e.
Nia hateten, IGEADE, I.P iha ekipamentu, operadór no kombustível prontu atende situasaun emerjensia.
Ekipa IGEADE, I.P daudaun koloka iha territóriu laran liuliu iha fatin risku dezastre naturál, mákina rai iha ne’eba no fatin ne’ebé la risku halo intervensaun ramata muda ba fatin seluk.
Daudaun ne’e, nia dehan, iha Viqueque mákina pezadu halo hela normalizasaun ba ponte Sumaco no ponte Welolo.
Aleinde ne’e, haree mós estrada kotu iha Lolotoe ne’ebé loke estrada foun, nune’e bele fasilita movimentu transporte públiku ba-mai.
Daudaun ne’e, IGEADE, I.P halo hela normalizasaun mota iha parte Hera-Dili relasiona ho udan boot loron hirak liu-ba ne’ebé rezulta inundasaun, tanba IGEADE, I.P prontu atende situasaun emerjénsia sira bainhira akontese iha territóriu.
Jornalista : Nelson de Sousa
Editór : Cancio Ximenes