iklan

NASIONÁL, HEADLINE

ANC no operadór telekomunikasaun sira halo diskusaun polítika dezenvolvimentu setór telekomunikasaun

ANC no operadór telekomunikasaun sira halo diskusaun polítika dezenvolvimentu setór telekomunikasaun

Prezidente ANC, Flávio Cardoso Neves. Imajen Tatoli/António Daciparu

DILI, 09 janeiru 2025 (TATOLI)–Autoridade Nasionál Komunikasaun (ANC, sigla portugés), kinta ne’e, halo enkontru ho operadór telekomunikasaun inklui empreza Internet Service Provider (ISP) hodi ko’alia kona-ba kooperasaun serbisu iha área telekomunikasaun ba oin.

“Ohin loron ita konvida parseiru ANC hanesan operadór telekomunikasaun no empreza ISP sira mai ko’alia kona-ba implementasaun polítika dezenvolvimentu iha setór telekomunikasaun ba tinan 2025 liga ho fibra ótika ne’ebé mak Governu Timor-Leste investe iha Austrália dada mai,” Prezidente ANC, Flávio Cardoso Neves, informa ba Agência Tatoli, iha salaun Ministériu Transporte no Komunikasun (MTK), iha Mercado-lama.

Nia konsidera, enkontru ne’e importante tanba hotu-hotu hatene katak parte MTK halo ona kompromisu barak ho nasaun viziñu sira liga ho telekomunikasaun nian, tanba ne’e halo enkontru ho intensaun iha kooperasaun no koordenasaun iha setór telekomunikasaun.

“Ita hatene ema barak hakarak halo ligasaun direita ba fibra ótika bainhira mai iha Timor ne’e, entaun ita fó tempu ida ba operadór telekomunikasaun no empreza ISP sira atu haree hamutuk potensiá no solusaun di’ak saida mak sei foti, tanba hahú tinan ne’e ba oin setór telekomunikasaun sei iha mudansa signifikante,” nia akresenta.

Notísia relevante : Governu diskute prontidaun setór transporte no telekomunikasaun

Antes fibra ne’e to’o mai Governu hamutuk ho operadór telekomuniksaun halo preprasaun másimu no kondisaun hotu atu hasoru ambiente foun.

“Presiza halo koordenasaun serbisu hamutuk, tanba importante mak ita hakarak konesaun ne’ebé ita iha setór komunikasaun viável ema hotu bele asesu ba internet hahú husi nasionál to’o rurál ho baratu, kontente no seguru,” Flávio dehan.

Durante enkontru, empreza ISP sira preokupa oituan kona-ba Starlink tanba Timor-Leste aplika rejime liberalizasaun iha sesór telekomunikasaun ba ema hotu ne’ebé interese.

“Maibé ANC hanesan reguladór mak tenke regula ka jere ho di’ak telekomunikasaun ne’e hodi garante katak tratamentu iguál ba ema hotu,” nia tenik.

Operadór telekomunikasaun no empreza ISP sira ne’ebé ohin partisipa reuniaun mak hanesan Metrolink, Lda, Raph Vision Electronic Unip, Lda, SacomTel, Lda, Marapido Net Unipessoal Lda, Apurva Unipessoal, Lda, Megtelco, Lda, dan Kacific Broadband Satellite Unipessoal, Lda no seluk tan.

Jornalista     : Arminda Fonseca

Edirora          : Julia Chatarina

iklan
iklan

Leave a Reply

iklan
error: Content is protected !!